Pak ditë pasi Blero dhe bashkëshortja e tij, Blerta, kërkuan ndihmë publike duke rrëfyer se ishin në fund të forcave fizike, psikike e financiare, ai ka ndarë një tjetër përditësim prekës nga spitali.
Në një shkrim të gjatë, Blero ka përshkruar rutinën e përditshme në përpjekje për ta mbajtur Blertën stabile. “Ky është një pjesë e vogël e përditshmërisë sonë aktualisht në spital, kur përgatis ushqimin parenteral (nëpërmjet venës). Blerta vazhdon të luftojë me dhimbje të forta, trajtohet me qetësues të fuqishëm dhe mjeku vjen dy herë në ditë për të tentuar të zbusë simptomat,” ka shkruar ai.
Blero tregon se rikuperimi pas operacionit po zgjat shumë më tepër nga ç’kishin shpresuar, pasi Blerta ka kaluar disa ndërhyrje në të njëjtin vend. “Ajo ende po rikuperohet nga operacioni, por fatkeqësisht procesi është i ngadalshëm dhe kërkon shumë durim. Ka ditë të mira dhe të këqija, por ajo nuk ndalet së luftuari,” ka shtuar ai.
Në fund, ai ka shprehur mirënjohjen e madhe ndaj të gjithë atyre që kanë qëndruar pranë tyre në këtë rrugëtim të vështirë. “Kemi durim dhe shpresë. Falënderojmë nga zemra të gjithë ata që mendojnë e luten për Blertën. Kjo dashuri dhe mbështetje na jep forcë çdo ditë,” ka përmbyllur ai. /Prive By Liberta Spahiu.
