Nga Kim Kardashian te Paris Hilton, shumë të famshëm njihen për mënyrën e të folurit të quajtur “vocal fry”.
Ky stil të foluri përfshin përdorimin e një zëri të ngjirur dhe të ulët, ku disa rrokje zgjaten me qëllim.
Zakonisht lidhet me gratë, të cilat shpesh tallen në rrjete sociale për këtë mënyrë të të folurit.
Megjithatë, një studim i ri ka zbuluar se “vocal fry” nuk është vetëm një gjë vajzash. Në fakt, shkencëtarët nga Universiteti Macquarie thonë se është po aq i zakonshëm edhe tek burrat.
Shembuj të njohur të burrave me këtë stil të foluri janë George Sanders në rolin e Shere Khan në “The Jungle Book” dhe Sean Connery në rolin e James Bond.
“Dëgjojeni Sean Connery-n kur thotë ‘Bond. James Bond’,” – këshillon Dr. Josha Penney, autor i studimit.
“Do të dëgjoni atë tingull ‘kërcitës’, por ai tërheq më pak vëmendje te burrat.”
“Vocal fry” është një mënyrë të foluri e zakonshme në Kaliforni, por është përhapur në mbarë botën falë popullaritetit të mediave amerikane.
Ky tingull zakonisht përdoret në fund të fjalive, kur zëri bie në nota më të ulëta dhe më të “kërcitura”.
Krahasohet shpesh me mënyrën se si Britney Spears shqipton me zë të ngjirur frazën “Oh baby, baby” në këngën e saj të famshme “Baby One More Time”.
Në studimin e ri, kërkuesit kishin për qëllim të hedhin poshtë mitin se “vocal fry” përdoret kryesisht nga gratë.
“Na u duk interesante që ndryshimet në karakteristikat e zërit, si ky ton ‘kërcitës’, i atribuoheshin kryesisht vajzave, edhe pse askush nuk kishte mbledhur të dhëna për ta mbështetur këtë,” – shpjegon Profesorja Felicity Cox, bashkautore e studimit.
Duke analizuar me kujdes regjistrime zanore, studiuesit nuk gjetën dallime të rëndësishme mes burrave dhe grave në përdorimin e “vocal fry”.
Por pse ekziston ende ky mit që është më i zakonshëm te gratë?
Sipas studiuesve, kjo lidhet me tonin e zërit.
“Tek gratë, ky tingull dallohet më shumë, sepse ndryshimi mes zërit të tyre normal – që është më i lartë – dhe atij ‘kërcitës’ është më i madh,” – shpjegon Dr. Penney.
“Ndërsa te burrat, ky kontrast është më i vogël, prandaj njerëzit e vënë re më pak.”
Çfarë është ‘vocal fry’?
“Vocal fry” ndodh kur disa rrokje zgjaten dhe vibrojnë në pjesën e pasme të fytit, duke krijuar një tingull si trokëllimë e lehtë – si kur një shkop kalon përgjatë një hekure.
Me këtë mënyrë të foluri, fraza “no way” bëhet “no waaaaaay”, dhe “whatever” shndërrohet në “whateverrrrrr”.
Përsëri, ajo krahasohet me mënyrën karakteristike të Britney Spears kur këndon “Oh baby, baby” në hitin e saj “Baby One More Time”.
/Prive By Liberta Spahiu
