Një histori e pabesueshme ka tronditur opinionin publik në Britani, pasi 22-vjeçarja nga Skocia, Kira Cousins, u zbulua se kishte sajuar të gjithë shtatzëninë e saj – nga barku i rremë deri te “foshnja” që në fakt ishte një kukull silikoni.
Gjatë muajve të fundit, Kira kishte ndarë me ndjekësit çdo moment të “pritjes së ëmbël”: foto me barkun që rritej, ekografi të falsifikuara dhe madje një ceremoni “gender reveal” për vajzën e saj të supozuar, që e quante Bonnie-Leigh Joyce.
Në momentin kur “lindi”, ajo publikoi foto të një të porsalindure me fytyrë engjëllore, pa e ditur askush se bebi ishte një kukull e tipit “reborn doll” – aq realiste saqë i mashtroi edhe më të afërmit e saj.
Por historia mori një kthesë edhe më të errët kur Kira u tha miqve dhe familjarëve se foshnja kishte vdekur nga një defekt në zemër. Rrjeti u mbush me mesazhe ngushëllimi, dhe njerëzit që e njihnin ndanë lot e fjalë të ndjera për vajzën që “kishte humbur fëmijën”.
E vërteta u zbulua kur nëna e saj gjeti kukullën në dhomë dhe përballi të bijën. Rrjeta shpërtheu dhe pas presionit publik, Kira pranoi gjithçka duke publikuar një ndjesë publike në internet:
“E di sa keq është ajo që kam bërë. E kam prishur keq. Nuk dija si të ndalesha sapo e nisa. Nuk kam asnjë justifikim. Nuk isha në gjendje të mirë mendore, por kjo nuk e bën atë që bëra të pranueshme. E di që kjo do të më ndjekë për një kohë të gjatë dhe se ndoshta kam humbur miq që nuk do t’i rikthej kurrë.”
Ajo iu drejtua edhe mikeshës së saj më të afërt, Neave, që kishte besuar çdo gjë:
“Neave, më vjen shumë keq. Ti ishe aty për mua gjatë gjithë kohës. Qave nga gëzimi, më ngrite kur isha poshtë, më besove çdo fjalë. Nuk e meritoje të të gënjeja në atë mënyrë.”
Reagimi i saj nuk ka arritur ta zbusë zemërimin e publikut. Qindra komente e kanë cilësuar rastin si “një mashtrim të sëmurë emocional”, ndërsa shumë gra që kanë kaluar humbje reale shtatzënieje janë ndier të fyer dhe të tronditura.
Pas skandalit, Kira është zhdukur nga rrjetet sociale dhe raportohet se po ndjek terapi psikologjike. Një histori që tregon kufijtë e errët të etjes për vëmendje në epokën e internetit, ku realiteti shpesh humbet nën hijen e një “postimi perfekt”. /Prive By Liberta Spahiu
