Këngëtari amerikan Chris Brown ka bërë një paraqitje të papritur në një gjykatë të Londrës të premten, për një seancë paraprake në prag të gjyqit të tij që pritet të zhvillohet vitin e ardhshëm, lidhur me akuzat për sulm ndaj një producenti muzikor me një shishe në një klub nate në Londër.
36-vjeçari, i njohur për hitet si “Loyal”, “Run It” dhe “Under the Influence”, më herët këtë vit mohoi akuzat për përpjekje për shkaktim dëmtimi të rëndë trupor dhe sulm që ka shkaktuar dëmtim fizik, për një ngjarje që prokurorët e cilësojnë si “sulm të paprovokuar”.
Ngjarja dyshohet të ketë ndodhur më 19 shkurt 2023 në klubin “Tape” në Hanover Square, Mayfair, ku viktima është producenti muzikor Abraham Diaw.
Edhe pse nuk ishte i detyruar të paraqitej, Brown u shfaq në Gjykatën e Lartë të Southwark në Londër, ku konfirmoi vetëm emrin e tij para trupit gjykues. Ai u paraqit në bankën e të akuzuarve së bashku me bashkë-të pandehurin, reperin dhe producentin nga Dallas, Omololu Akinlolu, 38 vjeç, i cili gjithashtu mohoi të gjitha akuzat.
Gjyqi i tyre pritet të zgjasë një javë dhe është planifikuar të nisë në tetor të vitit 2026.
Chris Brown u arrestua në maj të këtij viti në një hotel në Manchester, pak orë pasi kishte mbërritur në Britani me një avion privat, për herë të parë pas incidentit. Arrestimi u krye nga policia metropolitane, e cila e ndaloi atë në Lowry Hotel më 15 maj.
Ky zhvillim vjen si një tjetër faqe e zymtë në karrierën e artistit, i cili më parë ka qenë në qendër të polemikave për incidente të ngjashme. /Prive By Liberta Spahiu
