Në vitin 1977, revista prestigjioze “Vogue” publikoi një nga dietat më të pazakonta dhe më të diskutueshme të kohës, të njohur si “Wine and Eggs Diet”. Sipas artikullit origjinal, kjo dietë tre-ditore premtonte humbjen e rreth 2.5 kilogramëve në vetëm tre ditë.
Plani ditor përfshinte kryesisht vezë, verë të bardhë dhe kafe të zezë.
Në mëngjes rekomandohej një vezë e zier fort, një gotë verë e bardhë (preferohej Chablis) dhe një kafe e zezë. Dreka përbëhej nga dy vezë të ziera dhe dy gota verë, ndërsa darka mbyllej me një biftek 150 gramësh, piper të zi, lëng limoni, verën e mbetur (një shishe në ditë) dhe një kafe të zezë.
Edhe pse në atë kohë u cilësua si “dietë magjike”, sot ajo shihet si një shembull ekstrem i mungesës së balancës ushqimore. Nutricionistët theksojnë se konsumimi i sasive të mëdha të alkoolit dhe mungesa e frutave, perimeve e lëndëve ushqyese bazë mund të shkaktojë dehidratim, dobësi dhe mungesë vitaminash.
Sipas burimeve si Insider, The Independent dhe The Cut, kjo “dietë e verës dhe vezëve” mbetet një relike e dekadës kur idealet e dobësisë ekstreme shpesh vendoseshin përpara shëndetit. Sot ajo kujtohet më shumë si një kuriozitet kulturor sesa si një këshillë reale për humbje peshe. /Prive By Liberta Spahiu
