Pas vendimit të Gjykatës Kushtetuese, e cila i dha të drejtë Erion Veliajt dhe e riktheu atë në detyrën e kryetarit të Bashkisë së Tiranës, ka reaguar edhe Florjan Binaj.
Në një postim në rrjete sociale, aktori dhe kandidati i pavarur i mbështetur nga opozita thekson se për të dhe për qytetarët e Tiranës, thelbi mbetet i njëjtë, Tirana ka nevojë për ndryshim.
“Unë do të kandidoj për kryebashkiak të Tiranës kurdo që të mbahen zgjedhjet me të njëjtën bindje, përkushtim dhe energji për t’u shërbyer njerëzve me ndershmëri, përgjegjshmëri dhe transparencë. Kjo nuk është garë për pushtet, por përpjekje për qytetin tonë,” – shkruan Binaj.
Ai falënderon mijëra qytetarë për mbështetjen dhe shprehet i bindur se rrugëtimi për ndryshim do të vazhdojë, pavarësisht vendimeve politike apo institucionale.
“Ndryshimin që duan qytetarët e Tiranës nuk do ta ndalë askush,” – përfundon mesazhin e tij Binaj.
Ky reagim vjen pak orë pas publikimit të vendimit të Kushtetueses, që i dha fund debatit ligjor për drejtimin e Bashkisë së Tiranës, duke i hapur rrugë rikthimit të Erion Veliajt në zyrën e kryebashkiakut. /Prive By Liberta Spahiu
