Dukesha e Sussex, Meghan Markle, do të kthehet në ekranin e madh.
Pas një ndërprerjeje tetëvjeçare nga aktrimi, e cila filloi kur u fejua me Princ Harryn dhe mori detyrat mbretërore, Markle është gati të shfaqet në filmin e ardhshëm, “Close Personal Friends”.
Roli i fundit i madh i Markle ishte në serialin e njohur “Suits”, ku luajti paralegalën Rachel Zane deri në vitin 2017.
Ajo e kishte shpjeguar largimin e saj si “një kapitull i ri” në jetën e saj, duke theksuar dëshirën për të punuar si ekip me Harryn.
Siç raporton Variety, kthimi i saj do të jetë në formën e një cameo (paraqitje e shkurtër) ku ajo do të luajë vetveten.
Filmi është një komedi me Jason Orley regjisor, ku luajnë edhe emra si Lily Collins, Brie Larson dhe Henry Golding. Xhirimet po kryhen në Los Anxhelos, dhe Markle u pa në set këtë javë në Pasadena.
Filmi “Close Personal Friends” sillet rreth një çifti “të zakonshëm” që takon një çift të famshëm gjatë një udhëtimi, ku miqësia e shpejtë shkakton situata të sikletshme.
Ky rikthim në Hollywood vjen pas zgjatjes së partneritetit të Meghanit dhe Harryt me Netflix përmes Archewell Productions, nga ku kanë prodhuar disa dokumentarë dhe serinë e stilit të jetës së Markle, “With Love, Meghan”.
Tani mbetet për t’u parë se çfarë do të sjellë ky kapitull i ri në aktrim për Meghan Markle. /Prive By Liberta Spahiu
