Një moment i sikletshëm në Zyrën Ovale ka shkaktuar një debat të zjarrtë në SHBA, ku Presidenti Donald Trump u shfaq para kamerave sikur e zuri gjumi gjatë një njoftimi të rëndësishëm.
Pamjet nga takimi i transmetuar, i cili ishte i fokusuar te ulja e çmimit të barnave për humbjen e peshës, treguan Trumpin me kokën mbështetur pas karriges, me sy të mbyllur, duke lënë përshtypjen se po flinte.
Kjo shkaktoi një valë talljesh në rrjetet sociale. Kritikët nuk humbën kohë: Guvernatori i Kalifornisë, Gavin Newsom, e quajti Presidentin “DOZY DON” (Doni me Kotësira), duke i kujtuar Trumpit kohën kur ai vetë e quante paraardhësin, Biden, “Sleepy Joe”.
Shtëpia e Bardhë ka reaguar menjëherë, duke mohuar me forcë çdo akuzë për gjumë.
Në një deklaratë të ashpër, zyrtarët i cilësuan pretendimet e mediave liberale si “plehra”.
“Presidenti nuk po flinte; në fakt, ai foli gjatë gjithë kohës dhe mori shumë pyetje,” thuhej në reagim, duke theksuar se fokusi duhet të ishte te njoftimi historik për uljen e çmimeve të barnave GLP-1 (tani $149 – $249) që ndihmojnë miliona amerikanë.
Kjo nuk ishte e vetmja dramë e ditës. Gjatë të njëjtit takim, një ekzekutiv i industrisë farmaceutike u rrëzua papritur në Zyrën Ovale.
Ndërsa zyrtarët, duke përfshirë Dr. Oz, nxituan për të ndihmuar, pamjet treguan Presidentin Trump duke qëndruar larg dhe i distancuar nga situata e urgjencës.
Ekzekutivi më vonë u konfirmua se ishte shëruar. /Prive By Liberta Spahiu
