Biznesmeni dhe aktivisti Elton Ilirjani, një mik i ikonës së muzikës shqiptare, Parashqevi Simaku, ka lëshuar një alarm publik për gjendjen tejet të rëndë shëndetësore dhe financiare të këngëtares.
Në një intervistë për emisionin “Opinion” të Blendi Fevziut, e cila transmetohet sonte (e hënë) në orën 23:00, Ilirjani do të zbulojë detaje tronditëse. Në një video promo të publikuar paraprakisht, ai ka bërë të ditura disa nga faktet më shqetësuese.
Sipas Ilirjanit, këngëtarja ndodhet “në situatën më të vështirë” dhe prej 11 muajsh “nuk ka asnjë përmirësim”.
Ai theksoi se Simaku aktualisht nuk po merr asnjë mjekim dhe se pas daljes nga spitali, ajo është izoluar plotësisht. “Njeri që rri gjithë ditën në shtëpi. Nuk ka më motivim,” u shpreh Ilirjani. Ai shtoi se këngëtarja “thotë se IA (Inteligjenca Artificiale) e ndau,” dhe se ndonëse “është e divorcuar, nuk e pranon” këtë fakt, si dhe “djalin nuk e takon”.
Përveç krizës shëndetësore dhe personale, situata financiare paraqitet po aq dramatike. Ilirjani zbuloi se e vetmja ndihmë që ajo ka marrë ka qenë përmes një “GoFund-it”. Qeraja e banesës së saj, e cila deri më tani është paguar nga një zotëri me emrin Kadri Morina, përfundon në fund të Janarit 2026.
“Nga shkurti 2026 nuk ka asgjë,” tha Ilirjani, duke shtuar se problemi më i madh është mungesa e dokumenteve. “As ID që mund të aplikojë. Nuk pranon t’i bëjë.”
Elton Ilirjani pohoi se ndihma e tij ka qenë maksimale, duke përfshirë organizimin e emisioneve dhe gjetjen e njerëzve që i kanë ofruar shtëpi në Shqipëri, por tashmë situata kërkon ndërhyrje shtetërore.
“I duhet ndihma e shtetit shqiptar që të marrë mjekimin dhe t’i bëjë letrat, ID-në amerikane, ID-në shqiptare. Dikush të merret me këtë zonjë,” përfundoi ai apelin e tij.
Intervista e plotë me detaje të mëtejshme pritet të ndiqet sonte në mbrëmje. /Prive By Liberta Spahiu
View this post on Instagram
