Sot shënohen 11 vite pa një nga zërat më unikë dhe artistët më të kompletuar të muzikës shqiptare, Dr. Florin. Një datë që sjell nostalgji dhe kujton një humbje të madhe, por që gjithashtu na kthen te pasuria artistike që ai la pas.
Mikun dhe kolegun e tij të pandarë, bashkë-themeluesin e grupit legjendar “West Side Family”, e ka kujtuar sot Landi. Me anë të një postimi në Instagram, Landi ka ndarë fjalë prekëse, duke cituar edhe vargjet e këngës së tyre ikonike.
“11 vite pa Dr. Flori 🙏🏻 Githçka ende ndodh, jetojmë në Tironë… Jeta shkon dhe kujtimi mbetet! 🙏🏻” – shkruan Landi krahas fotos së mikut të tij të ndjerë.
View this post on Instagram
Ky dedikim i thjeshtë, por i thellë, na kthen pas në kohë, te vitet kur Dr. Flori, Landi dhe Miri revolucionarizuan muzikën urbane shqiptare.
Trashëgimia e një Artisti të Vërtetë
Të flasësh për Dr. Florin është të flasësh për më shumë sesa thjesht këngë; është të flasësh për tekste me peshë, për komente sociale të mprehta dhe për një aftësi të rrallë për të kthyer realitetin e përditshëm në art.
Ai ishte një kantautor i cili nuk kishte frikë të prekte tema delikate, shpesh me një notë ironie dhe patriotizmi lokal që kulmoi me “Tirona” – një këngë që u bë shumë shpejt himni jozyrtar i kryeqytetit dhe një “pasaportë” për këdo që ndihej krenar për origjinën e tij.
Si pjesë e “West Side Family”, ai na solli hite si “O Çike Çike” dhe “Eja me ne”. Por talenti i tij shpërtheu edhe në karrierën solo dhe në bashkëpunime të paharrueshme. Nga energjia e “Origjinale” me Aurela Gaçen, te balada e ndjerë “Mike” me Elvana Gjatën, e deri te interpretimet e fuqishme si “Zemërthyer” apo dedikimet për qytetin e tij si “Otr me zemër” dhe “Ku ka si Tirona”, Dr. Flori la pas një koleksion këngësh që i rezistojnë kohës.
Dr. Flori ishte një artist që i këndoi jetës pa filtra. Përtej muzikës, ai la pas dashurinë e madhe, bashkëshorten Blerinën dhe dy fëmijët, vajzën Kaltrinën dhe djalin Danielin, i cili lindi pak para ndarjes së tij nga jeta.
Ikja e tij e parakohshme la një boshllëk të madh jo vetëm në skenë, por mbi të gjitha te njerëzit e tij më të afërt. Edhe 11 vite pas ikjes së tij, muzika e tij dëgjohet me të njëjtin emocion, duke dëshmuar se, ashtu siç shkroi dhe miku i tij Landi, “jeta shkon, por kujtimi mbetet”. Dhe në rastin e Dr. Florit, kujtimi mbetet përmes artit të tij të pavdekshëm. /Prive By Liberta Spahiu
