Aktorit të njohur turk, Çağatay Ulusoy, i shtohet një tjetër titull në koleksionin e tij, por këtë herë i bazuar tërësisht në votën e publikut. Në një sondazh të ri që ka tërhequr vëmendje të madhe në mediat turke pikërisht këtë Nëntor, ylli i serialeve është kurorëzuar si “Mashkulli më i Pashëm i Turqisë”.
Sipas raportimeve nga mediat si “Sonsöz Gazetesi”, vlerësimi erdhi si rezultat i një sondazhi të gjerë të zhvilluar në një “platformë ndërkombëtare”, ku fansat dhe ndjekësit patën mundësinë të votonin për yjet e tyre të preferuar. Edhe pse në garë ishin shumë emra të njohur të showbiz-it turk, Çağatay ishte ai që grumbulloi numrin më të madh të votave, duke dëshmuar se popullariteti i tij i kapërcen kufijtë e Turqisë.
View this post on Instagram
Ky titull i ri duhet dalluar qartë nga fitorja e tij në vitin 2010. Ndërsa atë vit ai fitoi çmimin prestigjioz “Modeli më i Mirë i Turqisë” (Best Model of Turkey) nga një juri profesioniste, një çmim që i shërbeu si trampolinë për karrierën e tij në aktrim, shpallja e Nëntorit 2025 është një vlerësim tërësisht popullor që reflekton më shumë ndikimin dhe pëlqyeshmërinë e tij aktuale.
Ky vlerësim vjen gjithashtu në një moment kulminant të karrierës së tij. Pas sukseseve me serialet “Kübra” dhe “Gaddar”, Ulusoy aktualisht po “thyen” rekordet e shikueshmërisë me serialin “Eşref Rüya”, ku luan përkrah Demet Özdemir. Seriali, që tashmë është në sezonin e tij të dytë dhe transmetohet në Kanal D, vlerësohet si një ndër prodhimet më të suksesshme të momentit në Turqi.
Kjo periudhë e ngarkuar profesionalisht dhe suksesi i padiskutueshëm i “Eşref Rüya” padyshim kanë kontribuar në këtë fitore në sondazhin popullor, duke konfirmuar se Çağatay Ulusoy, pas më shumë se një dekade në skenë, mbetet një ikonë e padiskutueshme në industrinë turke. /Prive By Liberta Spahiu
