Presidentja e vendit, Vjosa Osmani, gjen kohë herë pas here të presë në takime figura të ndryshme, por një nga vizitoret e saj më të fundit ishte padyshim ndër më të veçantat.
Bëhet fjalë për talenten e re të muzikës, Kaia, e cila është mirëpritur së fundmi në zyrën e të parës së shtetit. E veshur me uniformë ushtarake me emblemën e UÇK-së, në frymën e festave të Nëntorit, vogëlushja duket se ka kaluar momente emocionuese pranë Presidentes.
Në imazhet e bëra publike, shihet momenti i takimit ku Kaia ka pranuar edhe një dhuratë simbolike nga e para e shtetit.
Përmes një postimi falënderues lidhur me vizitën, është bërë e ditur se ky takim ka qenë një shtysë e madhe për artisten e vogël.
“Kaia u ndje e vlerësuar në një mënyrë që vetëm zemra e një fëmije mund ta përjetojë — me një ftesë të sinqertë dhe një dhuratë të dhënë me dashuri nga vetë Ju. Ky gjest i vogël në dukje, për të ishte një moment i madh… një motivim i pastër që ta vazhdojë rrugën e saj në muzikë,” thuhet në reagim.
Ky takim vjen pas publikimit të këngës së parë të Kaias, e cila i është kushtuar Shqipërisë, projekt ky që sipas tyre mori edhe më shumë vlerë pas mbështetjes nga Presidentja. /Prive By Liberta Spahiu
