Një lajm fantastik vjen për kinematografinë kosovare! Qendra Kinematografike e Kosovës ka konfirmuar se filmi më i ri i regjisorit të mirënjohur Visar Morina, “Shame and Money”, do të ketë premierën e tij botërore në festivalin prestigjioz, Sundance Film Festival.
Kjo shënon një arritje të rrallë dhe historike, pasi është hera e dytë që regjisori Morina merr pjesë në kategorinë kryesore të këtij festivali gjigant.
Për çfarë flet filmi?
Sipas logline-it zyrtar, ngjarja ndjek një familje kosovare e cila, pasi humb jetën e saj në fshat, detyrohet të zhvendoset në Prishtinë. Aty nis kërkimi i tyre për një vend në shoqërinë që përshkruhet si “hiperkapitaliste”.
Kast yjesh
Filmi sjell në ekran emra shumë të dashur për publikun. Në rolet kryesore luajnë: Astrit Kabashi, Fiona Gllavica Flonja Kodheli, Kumrije Hoxha, Alban Ukaj, Aria Shala, Riga Morina, Melika Gashi, Selman Lokaj, Teuta Hajdini, Abdinaser Beka, Rebeka Qena, Tristan Halilaj, Basri Lushtaku, Rafet Abazi, Besnik Krapi dhe Eshref Durmishi.
Ky është një bashkëprodhim i gjerë ndërkombëtar dhe mbështetet nga Qendra Kinematografike e Kosovës si dhe fonde të rëndësishme evropiane.
Lajmin e ka përshëndetur edhe kryeministri Albin Kurti, i cili e ka ndarë njoftimin në llogarinë e tij zyrtare në Facebook, duke shkruar: “Urime regjisorit Visar Morina, aktorëve dhe gjithë ekipit krijues nga Kosova që po e çojnë punën e tyre në këtë skenë prestigjioze të filmit”.
Biletat për festivalin do të fillojnë të shiten nga data 14 janar. Urime ekipit për këtë sukses të madh!
/Prive By Liberta Spahiu
