Mbrëmja e djeshme shënoi nisjen e fazës emocionuese të netëve “Live” për X Factor Kids, por vëmendjen e të gjithëve e mori një mungesë e pazakontë.
Për herë të parë në historinë e spektakleve të mëdha televizive në Shqipëri, regjisorja ikonike Vera Grabocka nuk ka qenë e pranishme fizikisht në skenë për të drejtuar produksionin e saj.
Provat nën drejtimin virtual
Mësohet se e gjithë faza përgatitore dhe provat gjenerale të programit janë realizuar në një formë krejtësisht inovative. Grabocka i ka ndjekur dhe drejtuar lëvizjet e konkurrentëve të vegjël dhe stafin teknik përmes platformës Zoom direkt nga Amerika. Edhe pse milje larg, syri i saj kritik nuk ka munguar, duke koordinuar çdo detaj artistik nga distanca.
Alketa Vejsiu, “komandantja” e skenës
Gjatë ditëve të provave, barra kryesore e organizimit në terren i ka kaluar bashkëpunëtores së saj më të ngushtë, Alketa Vejsiut. Prezantuesja është parë të ketë gjithçka nën kontroll, duke u bërë “ura” lidhëse mes regjisë virtuale të Verës dhe realizimit në skenë. Ky koordinim duket se ka funksionuar më së miri, duke ruajtur standardin e lartë që ky produksion mbart prej vitesh.
Një mbrëmje “Live” ndryshe nga të tjerat
Edhe gjatë transmetimit live mbrëmjen e djeshme, vendi i zakonisht i regjisores në prapaskenë ishte bosh. Megjithatë, burime pranë produksionit konfirmojnë se Vera Grabocka e ka ndjekur programin në kohë reale, duke dhënë udhëzimet e saj në distancë. Megjithëse nuk ishte fizikisht aty, “dora” e saj u ndje në çdo performancë të fëmijëve që shkëlqyen në skenën e X Factor Kids.
Suksesi i natës së parë
Pavarësisht kësaj sfide logjistike dhe mungesës fizike të regjisores, nata e parë live u prit me shumë interes nga publiku. Talenti i fëmijëve dhe energjia e jurisë bënë që spektakli të rridhte pa probleme, duke dëshmuar se teknologjia tashmë ka thyer barrierat edhe në realizimin e programeve më komplekse televizive në vend. /Prive By Liberta Spahiu
