Edicioni i ri i “Big Brother Fan Club” ka çelur siparin ditën e sotme, por publiku u përball me një surprizë të këndshme që në sekondat e para. Në vend të moderatores së programit, Kiara Tito, skena u ndriçua fillimisht nga bashkëshorti i saj dhe fituesi i edicionit të dytë të “Big Brother VIP”, Luiz Ejlli.
Luizi mori rolin e prezantuesit për të bërë një hyrje speciale për atë që ai e quajti “gruan e jetës”. Me një monolog emocionues, ai u kujdes të theksonte mbështetjen e tij të pakushtëzuar ndaj saj, duke hedhur poshtë çdo hije dyshimi apo kritike.
“Ajo është një vajzë, grua tashmë, që nuk ka me qenë kurrë vetëm, se më ka mua në krah,” u shpreh Luizi.
Ai vijoi fjalën e tij me nota poetike dhe mbrojtëse: “Janë mundu me lënë në hije, por hija nuk e mbulon kurrë dritën. Ajo është dritë dielli. Bashkëshortja jeme, nana e Lunës, Kiara Tito Ejlli.”
Pas këtij prezantimi të rrallë, Kiara iu bashkua në skenë, ku çifti shkëmbeu një puthje pasionante. Moderatorja nuk i fshehu emocionet, duke e falënderuar partnerin e saj për këtë start të jashtëzakonshëm.
“Më ke lënë me zemër në dorë në momentet që po flisje,” i tha Kiara, duke e cilësuar si një “super prezantim”.
Nga ana tjetër, Luizi e mbylli momentin e tij me një deklaratë që konfirmon edhe një herë lidhjen e fortë mes tyre: “Unë bëra atë që do bënte çdo burrë për nanën e fëmijëve të vetë.”
Ky moment romantik shënoi nisjen zyrtare të “Fan Club”, duke sjellë një atmosferë pozitive dhe familjare në studio. /Prive By Liberta Spahiu
