I ftuar mbrëmjen e djeshme në emisionin “Big Talk”, Briliant Kuçi, familjar i banorit të Big Brother VIP Kosova 4, Edit, ka bërë një analizë të thellë të lojës së tij. Ai u ndal veçanërisht te dy dinamikat më të diskutuara të momentit: mbyllja e raportit me Dolchen dhe situatat e krijuara me Bian.
Sipas Kuçit, sjellja e Edit në këto situata nuk është thjesht strategji loje, por pasqyrë e edukatës dhe karakterit të tij jashtë shtëpisë.
Një nga pikat kryesore të diskutimit ishte fundi i romancës me Dolchen. Për familjarin e Edit, mënyra se si përfundon një marrëdhënie flet më shumë sesa vetë marrëdhënia.
“Kur një raport mbyllet, mënyra si mbyllet tregon më shumë se vetë raporti,” u shpreh Brilianti.
Ai theksoi se pranimi i distancës nga ana e Edit u bë me dinjitet të plotë. Kjo tërheqje, sipas tij, nuk duhet lexuar si dobësi, por si edukatë e një burri që di të largohet pa e ulur personin tjetër, duke ruajtur respektin reciprok deri në fund.
Lidhur me afrimitetin e Bian ndaj Edit, Brilianti sqaroi se Edi ka qenë i vetëdijshëm për mënyrën se si çdo kontakt mund të interpretohet nga jashtë. Ai nënvizoi se Edi është përpjekur me kujdes të kërkojë distancë, pa dashur të ofendojë apo të ulë Bian.
Megjithatë, ai vuri në dukje një standard të dyfishtë në gjykimin e situatave. Bia është parë në pozita të ngjashme, madje edhe më të papërshtatshme me banorë të tjerë, por ato nuk kanë bërë të njëjtën bujë.
Kur je një figurë e fortë në lojë si Edi, vëmendja është maksimale. “Pranë Edit, edhe heshtja lexohet,” tha Kuçi, duke shtuar se pranë tij çdo detaj kthehet në lajm dhe merr vëmendje ndryshe.
Në mbyllje të diskutimit, Briliant Kuçi bëri një portretizim të parimeve me të cilat është rritur banori. Ai theksoi se Edi nuk përdor forcën apo arrogancën për t’u dukur “macho”.
Filozofia e tij është e qartë: edhe kur situata është e pakëndshme, ai nuk zgjedh ta turpërojë një grua.“Ai nuk do ta ofendojë, nuk do ta përdorë forcën,” sqaroi Kuçi, duke bërë një paralelizëm me rastin e mëparshëm me Fjollën, ku Edi gjithashtu tregoi vetëpërmbajtje dhe menaxhim qytetar të situatës. /Prive By Liberta Spahiu
