Reperi i njohur shqiptar, Stresi, ka ditur gjithmonë si të tërheqë vëmendjen e ndjekësve dhe të krijojë zhurmë në rrjetet sociale, por postimi i tij i fundit ka lënë shumë njerëz me gojë hapur.
Në një InstaStory të publikuar së fundmi, Stresi ka ndarë një foto të Kryeministrit të Kosovës, Albin Kurti, por në një version që nuk e kemi parë kurrë më parë.
Përmes fuqisë së Inteligjencës Artificiale (AI), Kurti shfaqet i veshur si një “rebel” i vërtetë rruge: me një maskë (balaclava) në kokë, xhup “The North Face” dhe zinxhirë të rëndë floriri në qafë.
Ky postim vjen vetëm një ditë pas zgjedhjeve të 28 dhjetorit në Kosovë, ku Lëvizja Vetëvendosje dhe Albin Kurti korrën një fitore bindëse.
Stresi ka zgjedhur pikërisht këtë moment për të bërë ironi apo për të dhënë një mesazh mbështetjeje në stilin e tij, duke mbishkruar foton me fjalët: “Mos lësho pe… me datë 6 Janar”.
Përveç anës politike, ky postim shërben si një paralajmërim i fortë për projektin e tij të radhës që pritet të publikohet javën që vjen.
Kënga titullohet “VOLUM” dhe vjen në një bashkëpunim “bombë” me emrin legjendar të repit, MC Kresha.
Ndonëse kënga ishte paralajmëruar edhe më herët nga vetë reperi në një video-call ekskluziv për Prive By Liberta Spahiun, zgjedhja e figurës së Kurtit si një “rebel” për të shoqëruar datën 6 janar ka bërë që vëmendja e publikut të jetë maksimale.
Mbetet të shihet nëse ky “rebelim” i Albin Kurtit në foton e Stresit do të ketë ndonjë reagim tjetër, por një gjë është e sigurt: data 6 janar do të jetë e “nxehtë” për industrinë e muzikës! /Prive By Liberta Spahiu
