Ashtu siç ishte paralajmëruar prej kohësh, duke rritur pritshmëritë e fansave, mbrëmjen e kaluar u publikua bashkëpunimi i dy prej emrave më të rëndësishëm të hip-hopit shqiptar. Stresi dhe MC Kresha kanë lansuar projektin e tyre më të ri muzikor me titullin domethënës, “Volum”.
Që në orët e para të publikimit, kënga është pritur jashtëzakonisht mirë nga publiku.
Ky pëlqim masiv po reflektohet qartë edhe në shifrat e shikueshmërisë në platformën YouTube.
Brenda vetëm 17 orëve nga premiera, videoklipi ka kaluar shifrën e 200 mijë klikimeve, një tregues i qartë se projekti është rrugës për t’u shndërruar në një hit.
Kur bëhet fjalë për dy kolosë të tillë të zhanrit, suksesi është pothuajse i garantuar dhe, siç thonë shumë komentues, “s’kishte si të ndodhte ndryshe”. Kimia artistike mes Stresit dhe MC Kreshës ka sjellë një produkt cilësor që ka “shkundur” qetësinë e fillimvitit.
Për detajet teknike, projekti mban vulën e “Techpro Records”, me muzikë (beat) nga Gazu, ndërsa teksti është shkruar nga vetë reperët. Ana vizuale i është besuar “Danny Films”, duke e kompletuar këngën edhe me një videoklip të kuruar e top nivel.
Me këtë projekt, duket se Stresi dhe Kresha vendosën t’i japin vërtet “Volum” janarit dhe të startojnë vitin fuqishëm. /Prive By Liberta Spahiu
