Miley Cyrus, ylli 33-vjeçar që u bë e famshme botërisht me rolin e saj në “Hannah Montana”, ka shprehur dëshirën për t’u rikthyer në botën e aktrimit. Pas një pauze të gjatë, ku roli i saj i fundit i madh ishte në një episod të “Black Mirror” në vitin 2019, këngëtarja deklaroi për The Hollywood Reporter se do të donte shumë t’i ushtronte sërish aftësitë e saj si aktore.
Gjatë parakalimit në tapetin e kuq të Festivalit Ndërkombëtar të Filmit në Palm Springs, Cyrus u shpreh hapur për ambiciet e saj të reja.
“Shpresoj që ndonjë mendje gjeniale këtu të ketë diçka të duhur për mua,” tha këngëtarja e hitit “Flowers”. Ajo shtoi se është e lodhur duke qenë gjithmonë “boss” në botën e saj muzikore dhe se do të donte t’i bindej vizionit të dikujt tjetër. “Më thoni çfarë duan që unë të bëj? Do të më pëlqente shumë të hyja në botën e dikujt tjetër,” u shpreh ajo.
View this post on Instagram
Karriera e Cyrus në aktrim përfshin projekte të njohura si filmi i animuar “Bolt” (2008) dhe dramat romantike “LOL” (2012) dhe “The Last Song” (2010), ku luajti krah ish-bashkëshortit të saj, Liam Hemsworth. Megjithatë, ajo mbetet më e identifikuar me rolin e Miley Stewart në serialin e Disney, “Hannah Montana”, që nisi në vitin 2006 dhe zgjati për katër sezone.
Pikërisht në këtë festival, Miley Cyrus ngacmoi fansat edhe me mundësinë e një rikthimi të personazhit të dashur me paruke bionde. Ky lajm ka ngjallur shpresë te miliona ndjekës që presin të shohin nëse ylli i popit do të veshë sërish petkun e Hannah Montana-s apo do të shkëlqejë në një rol krejtësisht të ri dramatik. /Prive By Liberta Spahiu
