Menduat se telenovela e Cekki Hotit mbaroi me atë “Jo-në” e famshme në Indonezi? Gaboheni rëndë! Çiklisti nga Kosova, i cili u bë heroi i të gjithë të dashuruarve pasi pedaloi 23,000 kilometra për të marrë nusen në Bau Bau, sapo ka zbuluar planin e tij të ri që i kalon kufijtë e imagjinatës. Pasi u refuzua nga familja e vajzës për shkak të traditës absurde që “motra e madhe duhet të martohet e para”, Cekki nuk është kthyer në shtëpi për të qarë hallin. Përkundrazi, ai ka vendosur t’i tregojë botës se çfarë do të thotë dedikim i vërtetë me fjalët më poetike të mundshme.
“Vizioni im është ky: të përdor biçikletën time si stilolaps dhe kontinentet e Tokës si kanavacën time,” shkruan Cekki në postimin e tij që po bën namin në rrjet. Ai ka zbuluar se po nis një rrugëtim të ri për të formësuar gërmën “I”, formën e zemrës dhe gërmën “U” duke përshkuar Europën, Afrikën, Amerikën Latine dhe Australinë. Sipas tij, ky do të jetë “një mesazh i shkruar jo me bojë, por me çdo rrotullim pedali”.
Ky është reagimi më epik që kemi parë ndonjëherë pas një ndarjeje. Cekki na kujton se rruga e tij nuk ka qenë fushë me lule, duke theksuar me krenari: “Mbijetova tre luftëra, ika nga një tajfun, kalova shkretëtira, stuhi, xhungla… Shumë netë pa ushqim”. Dhe për skeptikët që dyshuan tek pasaporta e tij, ai ka një përgjigje flaka: “Të gjithë thanë se ishte e pamundur. Thanë se nuk do t’i kaloja kufijtë e Kosovës me atë pasaportë,” por ja që ai ia doli dhe po vazhdon. A do të mjaftojë kjo hartë gjigande dashurie për të bindur familjen indoneziane, apo Cekki thjesht po shkruan historinë e tij legjendare? /Prive By Liberta Spahiu
