Vetëm dy javë pasi befasoi fansat me njoftimin e papritur se do të tërhiqej përfundimisht nga performancat në klube të natës për vitin 2026, Yll Limani duket se sapo zbuloi “puzzle-in” që fshihej pas këtij vendimi drastik.
Artisti, i cili në deklaratën e tij theksoi se po kërkonte “hapësirë për diçka më të madhe” dhe për t’u takuar “ndryshe” me publikun, nuk ka vonuar të hedhë grepin e radhës, duke publikuar një imazh kriptik që ka futur në “gjueti” detajesh gjithë ndjekësit e tij besnikë.
Në postimin e fundit që po bën xhiron e rrjetit, Ylli ka shpërndarë një grafikë misterioze në sfondin e tij tashmë karakteristik të verdhë.
Imazhi shfaq yje të numëruar nga 1 deri në 14, të shpërndarë në një formacion që, për syrin e stërvitur, të kujton qartësisht hartën gjeografike të Europës. A është ky itinerari i shumëpërfolur i një turneu masiv ndërkombëtar?
Kjo është pyetja që po dominon seksionin e komenteve. Numrat duket se korrespondojnë me vendndodhje specifike, duke lënë të kuptohet se koncertet e zakonshme në diskoteka do të zëvendësohen me salla koncertale dhe skena të mirëfillta nëpër qytetet kryesore europiane.
Dhe nëse kishit ende dyshime se diçka gjigante po vjen, reagimi i vetë këngëtarit në Instastory i vë vulën. Kur një ndjekës e pyeti direkt nëse bëhet fjalë për një “International tour”, Ylli zgjodhi të përgjigjej me një “qysh breeeeeeee” tipike të tijën — një reagim që në zhargonin e tij shpesh përkthehet si një pranim ironizues kur “kapet mat”.
Duket se plani për 2026-ën është kristalizuar: Yll Limani po përgatitet të lërë pas atmosferën e klubeve për të synuar një audiencë më të gjerë në një format që industria jonë muzikore rrallë e ka parë. Prive By Liberta Spahiu
View this post on Instagram
