Nëse menduat se Endri do të mjaftohej vetëm me një baladë pas gjithë asaj zhurme mediatike, e keni pasur gabim. Këngëtari, i cili u rikthye fuqishëm në qendër të vëmendjes për shkak të historisë me banoren e Big Brother VIP Kosova, Benitën, nuk ka humbur kohë.
Pa u mbushur ende dy javë të plota nga publikimi i këngës “Pa Ty” – projekt ky që shënoi rikthimin e tij në skenë – Endri sapo ka publikuar këngën e tij më të re. Dhe titulli? Është fiks ai që prisnim nga një djalë që po flet përmes muzikës: “Ku janë premtimet”.
Duket se strategjia e Endrit është e qartë: godit sa është hekuri i nxehtë. Për këtë projekt të ri, ai i ka qëndruar besnik formulës fituese. Kënga mban sërish vulën e padiskutueshme të ZZAP, duke garantuar një prodhim serioz muzikor, ndërsa për anën vizuale, Endri ka zgjedhur sërish rrugën e teknologjisë.
Videoklipi është realizuar përsëri me Inteligjencë Artificiale (AI) nga Visiona AI Studio. Kjo zgjedhje duket se po i mundëson atij të jetë “raketë” në publikime, duke sjellë dy klipe brenda 10 ditësh – një ritëm që shumë artistë të tjerë do ta kishin zili.
Ndërkohë që diskutimet në shtëpinë e BBVK vazhdojnë, Endri po jep përgjigjet e tij nga jashtë, dhe me sa duket, “premtimet” janë tema e radhës që ai do të diskutojë me publikun. A është ky një mesazh tjetër i koduar apo thjesht frymëzim i momentit? Muzika flet vetë. / Prive By Liberta Spahiu
