Seriali i animuar “The Simpsons” ka fituar prej kohësh statusin e një “profeti” modern, por zbulimi i fundit i fansave i ka kaluar kufijtë e imagjinatës, duke përfshirë këtë herë ishullin famëkeq të Jeffrey Epstein.
Në episodin e sezonit të 12-të, të titulluar “The Computer Wore Menace Shoes”, i cili u transmetua për herë të parë në vitin 2000, personazhi i Homer Simpson krijon një faqe interneti për të përhapur thashetheme dhe teori konspirative nën pseudonimin “Z. X”.
Mes shumë postimeve, shikuesit pikasën një njoftim rrëqethës ku shkruhej: “Vëmendje: Disa të çmendur në ndonjë ishull sundojnë fshehurazi botën”.
Ky detaj po interpretohet gjerësisht si një referencë për ishullin privat në Ishujt Virgjër të SHBA-së, ku miliarderi Epstein dyshohet se organizonte aktivitete kriminale me elitën botërore.
Reagimet në rrjetet sociale kanë qenë të menjëhershme dhe të shumta, ku ndjekësit shprehen të shokuar me saktësinë e këtij detaji.
“Mbeta pa fjalë pas këtij episodi”, “Ky nuk është një serial, por një përshkrim i jetës sonë nga jeta reale”, dhe “Ata dinin gjithçka”, janë vetëm disa nga komentet që po qarkullojnë kudo.
Misteri rëndohet edhe më shumë nga pretendimet e disa përdoruesve se krijuesi i serialit, Matt Groening, dyshohet se ka udhëtuar me një nga avionët privatë të Epstein, duke ngritur pikëpyetje nëse këto “parashikime” janë thjesht rastësi apo njohuri të brendshme mbi ngjarjet që po gatiteshin.
Ky rast i shtohet listës së gjatë të parashikimeve të pabesueshme që “The Simpsons” kanë bërë ndër vite.
Seriali goditi në shenjë zgjedhjen e Donald Trump si president 16 vite para se të ndodhte, tragjedinë e 11 shtatorit përmes imazheve simbolike në një revistë, e madje edhe blerjen e kompanisë “20th Century Fox” nga Disney shumë vite para transaksionit real.
Gjithashtu, parashikimi i një pandemie globale përmes “Gripit të Osakës” në një episod të vitit 1993 vazhdon të mbetet një nga koincidencat më të frikshme për publikun.
Me zbulimin e fundit rreth ishullit të Epstein, debati nëse skenaristët e serialit kanë një dritare drejt të ardhmes apo thjesht një inteligjencë të jashtëzakonshme për të analizuar shoqërinë, mbetet më i ndezur se kurrë.
Një gjë është e sigurt: sa herë që një ngjarje e madhe trondit botën, njerëzit kthehen te “The Simpsons” për të parë nëse Homeri e kishte thënë i pari. /Prive By Liberta Spahiu
