Reperi i njohur Gold AG ka reaguar ashpër pas lajmit që tronditi kryeqytetin ditën e djeshme, ku një arsimtar në Shkollën e Mesme të Ulët “Pavarësia” sulmoi fizikisht një nxënës.
Sipas detajeve mësimdhënësi është provokuar fizikisht dhe verbalisht nga nxënësi në fjalë duke përdorur metoda të ulta e primitive ndaj tij.
Pra profesori është provokuar në sallë nga nxënësi 15 vjeçar i cili dyshohet se kishte plan të parapërgatitur provokimin me një grup shokësh të cilët i qëndronin prapa për të incizuar në të vetmen sallë ku nuk kishte kamera.
Përmes një shkrimi prekës dhe kritik ka reaguar Gold Ag. Artisti ka vënë theksin te rënia e moralit dhe respektit ndaj figurës së mësuesit në ditët e sotme.
Dallimi mes gjeneratave: “Kishim turp të ndiznim cigaren”
Gold AG e ka nisur reagimin e tij duke kujtuar kohën kur figura e mësuesit ishte e shenjtë. Ai tregon se në gjeneratat e kaluara, respekti ishte aq i madh sa edhe në mbrëmjen e maturës nxënësit kishin turp të ndiznin cigaren para arsimtarëve. Sipas tij, sot situata ka degraduar deri në atë pikë sa nxënësit i drejtohen profesorit me shprehjen “o bir” dhe i shajnë ata pa asnjë ngurrim.
Historia personale: “Isha nxënës para saj edhe pasi u rrita”
Si fëmijë i dy mësuesve, reperi ndau një histori emocionuese për mësuesen e tij të ndjerë, Minire, të cilën e respektonte aq shumë sa fjalët i lidheshin në gjuhë sa herë që e takonte. Ai theksoi se pavarësisht karrierës së tij dhe takimeve me personazhe të rëndësishme botërore, para mësueses ndihej gjithmonë nxënës, gjë që tregon vlerën e edukatës familjare.
Mesazhi i prerë për prindërit: “Mos thoni s’ka të drejtë të ma prekë fëmijën”
Gold AG nuk e ka lënë pa thumbuar edhe sjelljen e prindërve modernë, të cilët shpeshherë mbrojnë gabimet e fëmijëve të tyre. Ndonëse thekson se dhuna nuk është zgjidhje, ai u bën thirrje prindërve që të edukojnë fëmijët dhe të mos i kthejnë telefonat në “armë” kundër mësuesve. “Ti thuaj sa të duash s’guxon me ma prekë evladin tem, po dil njëherë në vend të profesorit dhe pastaj fol,” përfundoi ai mesazhin e tij të fortë. /Prive By Liberta Spahiu
