Të gjithë e mbajmë mend atë natë të tensionuar në Prime të Big Brother VIP Kosova, kur debati mes Labinot Rexhës dhe Kushtrim Kelanit kaloi çdo limit të një loje televizive. Me një siguri absolute prej “padroni” të tregut muzikor në diasporë, Labi i deklaroi hapur Kushtrimit se “Zvicrën duhet ta harronte” si destinacion për koncerte.
Ishte një moment që u diskutua gjatë, pasi dukej se inatet personale po rrezikonin të ktheheshin në barriera reale profesionale për moderatorin dhe këngëtarin, sapo ai të dilte nga shtëpia. Por, siç ndodh rëndom në showbiz, realiteti jashtë kamerave shpesh i përmbys deklaratat e bujshme të bëra në gjaknxehtësi e sipër.
Mbrëmja e djeshme e Shën Valentinit ka shërbyer si “hakmarrja” më e ëmbël dhe e heshtur e Kushtrimit ndaj atij kërcënimi publik. Pa zhurmë dhe pa deklarata pompoze, ai ka postuar pamje nga performanca e tij live, pikërisht në “zonën e ndaluar” – në Zvicër. Atmosfera në klub dhe flamuri zviceran i vendosur demonstrativisht në postimet e tij, ishin përgjigja më e qartë se “embargoja” e Labinotit nuk ka funksionuar.
Kushtrimi jo vetëm që nuk u bllokua, por arriti të sigurojë një nga datat më të kërkuara të vitit, atë të 14 Shkurtit, duke dëshmuar se tregu është i hapur për të gjithë dhe se fjalët e rënda në Prime mbeten thjesht pjesë e show-t brenda mureve të shtëpisë. / Prive By Liberta Spahiu
