Prime-i i mbrëmshëm në Big Brother VIP Albania shënoi fundin dramatik të aleancës mes Mirit dhe Selinës, një raport që deri pak ditë më parë, dukej i palëkundur.
Krisja që kishte nisur prej ditësh u vulos me një distancim të ftohtë nga ana e Selinës, e cila hapurazi ka zgjedhur të afrohet me Gimbon, duke e lënë mikun e saj të vjetër në hije. Ky ndryshim i papritur i dinamikave është lexuar nga Miri dhe mbështetësit e tij si një “tradhti” e pastër loje, ku miqësia u sakrifikua për hir të romancës apo strategjive të reja.
Por nëse Miri brenda shtëpisë zgjodhi të mos bënte skena të mëdha, jashtë mureve reagimi ka qenë i menjëhershëm dhe thumbues. Landi Hysi, krahu i djathtë i Mirit në West Side Family, nuk e ka kapërdirë këtë sjellje. Ai ka postuar një foto tejet domethënëse ku shfaqet një burrë (i etiketuar si Miri) me gjarpërinj rreth qafës, njëri prej të cilëve e kafshon në faqe.
Me mbishkrimin “Dita e 56 më në fund”, Landi nënkupton se durimi mori fund dhe se Selina, sipas tij, hoqi maskën pas gati dy muajsh, duke u zbuluar si “gjarpri” që kafshoi dorën që e ushqeu me miqësi. Ky postim konfirmon se për rrethin e ngushtë të Mirit, afrimi i Selinës me Gimbon nuk është thjesht një lojë, por një thikë pas shpine ndaj besnikërisë që Miri i kishte ofruar pa kushte. / Prive By Liberta Spahiu
