Drama dhe tensioni kanë kapluar sot studion e “Big Brother Fan Club”, duke e vendosur ish-banoren e përfolur, Inën, përballë një situate vërtet të pakëndshme dhe plot ankth. Gjatë transmetimit live, asaj iu shfaq një video që la pa fjalë si Inën ashtu edhe publikun që po e ndiqte. Në pamjet e xhiruara në një makinë gjatë natës, Keijsi dëgjohej teksa mohonte çdo ndjenjë të vërtetë për të, duke u shprehur ftohtë se gjithçka mes tyre kishte qenë thjesht një strategji loje për t’i mbijetuar formatit.
Pamjet bënë menjëherë efektin e tyre. Ina u pa dukshëm e tensionuar në karrigen e saj, me sytë që i reflektonin një miksim të thellë mes zhgënjimit të atij momenti dhe sikletit nga kamerat e studios.
Për disa minuta të gjata, u duk se romanca e tyre po merrte një fund të hidhur mu përpara syve të të gjithë shqiptarëve.
Por, teksa situata po bëhej gjithnjë e më gri, e gjitha doli të ishte thjesht një rreng televiziv i përgatitur me mjeshtëri nga stafi i emisionit.
E vërteta ishte tërësisht tjetër. Ndërkohë që Ina vuante tensionin e kamerave, Keijsi ishte fshehur prapa skenës duke pritur radhën e tij për të hyrë në studio. Ai u shfaq papritur i buzëqeshur me një buqetë me lule në duar, duke e shpëtuar situatën dhe duke dëshmuar se raporti i tyre po lulëzon jashtë izolimit pas largimit të Inës nga shtëpia.
Një fund super romantik për një rreng që na mbajti të gjithëve pezull për pak momente. /Prive By Liberta Spahiu
