Drama nuk ka fund dhe kur menduam se gjërat ishin qetësuar, Post Big Brother na solli një nga përplasjet më të ftohta dhe më të tensionuara mes Benitës dhe Klodit, e gjitha kjo duke u zhvilluar pikërisht aty ku nisi gjithçka, brenda mureve të shtëpisë. Dyshja, që dikur ndante një raport krejt tjetër, u përball me një distancë që e detyroi moderatorin Alaudin të ndërhynte për të kërkuar arsyet e kësaj krisjeje. Klodi nuk u përmbajt aspak, duke deklaruar se vendimi i tij lidhet direkt me ofendimet që Benita ka bërë. Ai theksoi se ka vendosur më në fund të respektojë veten, duke u shprehur se është dashur t’i merrte shumë më seriozisht reagimet e saj, sidomos pasi pa bisedat që ajo kishte bërë me Ludon. Për Klodin, gota u derdh kur Benita i mori vetes të drejtën të fliste për të dashurën e tij dhe lojën që ai po bënte.
Nga ana tjetër, Benita nuk e priti aspak mirë këtë qëndrim të ri dhe shpërtheu në akuza, duke e quajtur Klodin dyfytyrësh dhe totalisht “fake”. Ajo i kujtoi se në atë ambient ai toleronte gjithçka dhe nuk shqetësohej për fjalët e saj kur ishte në momente temperamente. Me tone të larta, ajo e akuzoi se ka ndryshuar qasje vetëm pasi ka takuar të dashurën ose është ndikuar nga rrjetet sociale, duke i thënë troç se njerëzit e tij e kanë gënjyer dhe se po tregohet tejet i papjekur nëse bie pre e këtyre ndikimeve.
Por, ajo që i vuri kapakun debatit ishte ndërhyrja e Elijonës. Ajo theksoi se mendimi i familjarëve, e konkretisht fjalët e motrës së Klodit, kanë një peshë të madhe dhe duhen marrë parasysh. Ky detaj i rëndësishëm ishte një konfirmim i pastër i atyre që kishim paralajmëruar dhe raportuar saktësisht më herët në Prive By Liberta Spahiu. Tensioni i madh dhe kjo qasje e re e prerë e Klodit bënë që Benita të mos e mbante dot veten dhe të shpërthente në lot, pikërisht në atë shtëpi ku kishin ndarë aq shumë momente bashkë. Megjithatë, Klodi i qëndroi fjalës së tij, duke përfunduar se nuk kishte asnjë qëllim ta ofendonte Benitën, por thjesht po përballet me bisedat dhe veprimet që tashmë i ka parë qartë. /Prive By Liberta Spahiu
