Kush tha që koha nuk mund të ndalet? Njihuni me Chuando Tan, ikonën e modës dhe ish-modelin nga Singapori, i cili sapo ka festuar ditëlindjen e tij të 60-të, por i ka lënë të gjithë pa fjalë sepse duket të paktën dy dekada më i ri. Fotot e tij të fundit në Instagram, ku pozon pranë një makine Jeep me tullumbace që tregojnë moshën, kanë pushtuar rrjetin. “Koha është e vetmja pasuri e vërtetë, çdo lindje e diellit është një trashëgimi, jo një garanci,” shkroi ai në postimin e tij që mori mijëra pëlqime.
Por le të jemi të sinqertë, të gjithë duan të dinë se çfarë ha dhe si jeton ky njeri që ngjan si një “vampir” modern. Sekreti i tij nuk ka të bëjë me operacionet plastike, por me një disiplinë të hekurt që ai e ndan thjesht: 70 për qind dietë dhe 30 për qind stërvitje. Chuando konsumon shumë ushqime të pasura me proteina si mishi i pulës, vezët e ziera dhe supa me peshk, duke shmangur totalisht ushqimet e përpunuara. Për të mbajtur trupin në formë, ai bën stërvitje të rregullt në palestër dhe madje mund të pijë vaj ulliri si “shot”.
Për një lëkurë të freskët dhe të pastër, ai zbulon se ndryshe nga tendencat e zakonshme për t’u mbushur me dhjetëra produkte apo maska detoksifikuese dhe serume me vitaminë C, ai zgjedh minimalizmin: nuk pi duhan, shmang kafenë e alkoolin dhe sigurohet të flejë para orës 23:00 të mbrëmjes. Në fund të fundit, duket se e gjithë rinia buron nga kujdesi i përditshëm dhe një mentalitet tejet pozitiv. /Prive By Liberta Spahiu
