Largimi i Enxhi Nasufit nga emisioni i mëngjesit bëri jo pak zhurmë disa muaj më parë. Megjithatë, prezantuesja dhe artistja duket se po e shijon në maksimum këtë periudhë qetësie, duke i dedikuar më në fund kohë vetes dhe mirëqenies së saj. Së fundmi, ajo ka zgjedhur të shkëputet në Stamboll për t’u kuruar deri në detaj, një rrugëtim bukurie dhe kujdesi ku i ka besuar ekspertizës së A+ Medical Solutions.
Kjo agjenci tashmë është kthyer në zgjedhjen e padiskutueshme të shumë personazheve publike për të marrë shërbimet estetike me standardet më të larta pa pasur nevojë të shqetësohen për asgjë. Pikërisht nga kjo fazë rigjenerimi total dhe relaksi jashtë vendit, Enxhi ka gjetur kohën të flasë hapur për pasardhësen e saj në karrigen e mëngjesit, Heidi Baçin.
Pavarësisht shkëputjes nga angazhimi i përditshëm herët në mëngjes, Enxhi tregoi se ruan vlerësimin maksimal për institucionin. Ajo theksoi se Top Albania Radio mbetet ndër më të mirat në treg dhe se frekuencat e saj vazhdojnë të dëgjohen rregullisht në makinën e saj. Sa i përket Heidit, e cila tashmë zgjon shqiptarët krah Blendi Salajt, ish-prezantuesja e formatit zgjodhi një miksim mes sportivitetit dhe vlerësimit profesional. Enxhi pranoi me shaka se nuk mund ta ndjekë me rigorozitet çdo ditë emisionin pasi, siç shprehet ajo, më në fund po rikuperon gjumin e humbur të mëngjeseve. Megjithatë, ajo nuk i kureseu vlerësimet për pasardhësen e saj.
“Heidi është shumë pozitive, e buzëqeshur, cilësi shumë e mirë për vajzë ekrani. Do uroja t’i merrte më të mirën,” u shpreh ajo duke cituar kështu pikat e forta të moderatores së re.
Më tej, duke u ndalur tek shkolla e pashmangshme që të fal një format i tillë, Enxhi e përmbylli komentin e saj duke theksuar se radioja është vendi ideal për të fituar shpejtësi dhe sportivitet në komunikim.
Ajo shtoi se nëse ka diçka thelbësore që Heidi mund të përfitojë e të mësojë nga kjo eksperiencë intensive, është pikërisht disiplina, profesionalizmi dhe dinamika në të folur. /Prive By Liberta Spahiu
