Filmi i shkurtër “Two People Exchanging Saliva”, me protagoniste aktoren e talentuar shqiptare Luana Bajrami, ka fituar çmimin prestigjioz Best Live Action Short Film në ceremoninë e ndarjes së çmimeve Oscar. Kjo fitore shënon një moment të artë për kinematografinë dhe një arritje monumentale për aktoren shqiptare.
Kjo kategori dhuroi gjithashtu një nga momentet më të pazakonta dhe të rralla në historinë e Academy Awards. Votat e jurisë rezultuan në një barazim perfekt, duke bërë që çmimi të ndahej mes dy filmave: “Two People Exchanging Saliva” dhe filmit tjetër të nominuar, “The Singers”.
Në këtë projekt unik kinematografik, Bajrami interpreton rolin kryesor në një histori thellësisht origjinale të vendosur në një Paris distopik. Në këtë realitet të “pazakontë”, puthjet janë të ndaluara me ligj dhe çdo shfaqje intimiteti konsiderohet shkelje e rëndë e dënohet. Për të theksuar absurditetin e kësaj shoqërie, monedha e këmbimit për blerjet janë shuplakat, ndërsa personazhet përballen me një realitet thellësisht absurd dhe të ftohtë.
Fitorja e këtij filmi e vendos përfundimisht emrin e Luana Bajramit në skenën më të madhe të kinematografisë botërore, duke e kurorëzuar talentin e saj në majat e Hollivudit. Performanca e saj përkrah aktores Zar Amir Ebrahimi ka lënë gjurmë të pashlyeshme, duke shënuar kështu një moment të veçantë dhe plot krenari për shqiptarët në skenën e Oscars. /Prive By Liberta Spahiu
