Labinot Tahiri, këngëtari dhe ish-deputeti i njohur për angazhimin e tij humanitar, ka thyer heshtjen sa i përket të ardhmes së tij në skenën politike.
Në një intervistë të dhënë për Prive By Liberta Spahiu, Labi ka lënë të kuptohet se dera për një rikthim në parlament është më e hapur se kurrë, por me disa kushte specifike që nuk i negocion.
Labi, i cili gjithmonë ka gëzuar një mbështetje të gjerë popullore, u shpreh i bindur para mikrofonit tonë se puna e tij nuk ka kaluar pa u vënë re.
“Edhe atëherë kur kam qenë në parlament, edhe tani që s’jam, unë mendoj dhe besoj që popullata janë mirënjohës,” tha ai, duke shtuar se gatishmëria e tij për t’i shërbyer vendit mbetet e palëkundur.
Sipas tij, qytetarët kanë nevojë për energjinë dhe punën që ai përfaqëson, duke e cilësuar veten si një njeri që “nuk rri” por punon për popullin më shumë se për interesat e tij personale. Sa i përket hapave të radhës, Tahiri ishte mjaft i qartë gjatë bisedës: rikthimi varet direkt nga serioziteti i ofertave që do t’i vijnë në tavolinë.
“Besoj që kthehem, nëse është ndonjë ofertë e mirë, serioze dhe nëse i kam duart e lira me punu,” deklaroi ai për Prive By Liberta Spahiu, duke bërë të ditur se nuk do të pranonte një pozicion ku do të ishte thjesht një numër në listë.
Megjithëse mendon se vendi nuk ka nevojë të shkojë menjëherë në zgjedhje, ai pranoi se dëshira për të garuar si deputet është aty, gati për t’u aktivizuar në momentin e duhur. /Prive By Liberta Spahiu
