Prej disa javësh tashmë, hapësirës mediatike i është shtuar një format që po tërheq vëmendjen e ndjekësve të muzikës urbane. Bëhet fjalë për “R Studio”, podcast-in në Radio Dukagjini, i cili po vazhdon rrugëtimin e tij me mjaft sukses nën drejtimin e Fis Junikut. Me një qasje më të natyrshme dhe biseda të drejtpërdrejta, ky program po ofron një platformë ku artistët flasin hapur për karrierën e tyre dhe më pas dhurojnë performanca live për publikun. Fisi po arrin të mbajë një ritëm të qëndrueshëm intervistash, duke e bërë emisionin një hapësirë interesante për të parë nga afër të rejat e tregut muzikor shqiptar.
Në karrigen e të ftuarve gjatë këtyre javëve të para kanë kaluar disa nga emrat e lakuar të momentit në skenë, duke përfshirë artistë si Bay T, Loree, Adion dhe Biondi.
Secili prej tyre ka sjellë në studio stilin e vet dhe ka ndarë detaje rreth projekteve muzikore, duke u pritur mjaft mirë nga dëgjuesit. Ndërkohë, vëmendja sonte kthehet te episodi i shtatë i cili premton të njëjtin ritëm.
Të mërkurën në mbrëmje, duke filluar nga ora 22:00, radha për t’u ulur përballë Fisit dhe për të marrë mikrofonin i takon reperit Gesko. Pritet një bisedë e këndshme dhe performanca live që nxjerrin në pah anën autentike të artistit. Nëse doni të dëgjoni më shumë nga Gesko dhe planet e tij të reja, sonte e dini se ku duhet të akordoheni . /Prive By Liberta Spahiu
