Reperi i njohur Getinjo ka shprehur së fundmi një shqetësim mjaft aktual përmes disa postimeve në llogarinë e tij në Instagram. Përmes opsionit Instastory, ai ka ndarë me ndjekësit mendimin e tij rreth përdorimit masiv dhe të tepruar të inteligjencës artificiale, konkretisht ChatGPT-së, duke theksuar se ky fenomen ka filluar ta bezdisë.
Artisti kërkoi mendimin e fansave duke u shprehur se kjo dukuri është duke e munduar dhe donte të dinte nëse edhe të tjerët ndajnë të njëjtin mendim me të. Sipas Getinjos, njerëzit janë bërë të varur nga kjo platformë, por ajo që e pengon më së shumti është fakti se po teprohet duke e përdorur për gjendjen emocionale, si dhe për çështje thellësisht intime e personale me njerëzit e tjerë.
Duke u treguar i sinqertë, Getinjo pranoi se edhe ai vetë e përdor këtë mjet inteligjence artificiale, por e kufizon atë vetëm për të marrë njohuri dhe informacione të reja. Ai u shpreh prerë se ChatGPT nuk duhet të përdoret për probleme familjare. Për reperin, këto janë tema delikate që duhen folur ballë për ballë me njerëzit e dashur, si nënën, vëllain, bashkëshortin apo bashkëshorten.
“Ndoshta e kam keq unë, por sipas meje ky është një problem,” shtoi ai, duke vënë në pah rrezikun e ftohjes së raporteve njerëzore. Megjithatë, artisti e mbylli reagimin e tij duke treguar respekt për lirinë e secilit, duke përfunduar me mesazhin: “Ju dua njerëz, vazhdoni me ChatGPT në mënyrën si të doni ju.” /Prive By Liberta Spahiu
