Xheneta Fetahu ka qenë një nga emrat më të lakuar të showbiz-it shqiptar kohët e fundit, mes raporteve mediatike dhe deklaratave të saj të drejtpërdrejta. Megjithatë, ajo ka vendosur të nisë një kapitull të ri profesional.
Pas rikthimit në përditshmëri dhe rrëfimeve të fundit për punët e saj të mëparshme në Suedi si kameriere dhe menaxhere hoteli, ish-finalistja e “Big Brother VIP Kosova 3” po i kthehet angazhimeve të reja fizike, këtë herë në industrinë e bukurisë në kryeqytet.
Ajo ka hapur një llogari të re në Instagram të dedikuar trajtimit dhe estetikës së vetullave, duke njoftuar zyrtarisht nisjen e këtij rrugëtimi si sipërmarrëse.
Në postimin e saj të parë drejtuar ndjekësve, Xheneta thekson se prioriteti i saj është një rezultat sa më natyral për klientet. Puna tashmë ka filluar dhe ajo ka ndarë detajet e kontaktit, duke bërë të ditur se aktualisht është e stacionuar në një studio në lagjen Emshir të Prishtinës.
Pak kohë më parë, në një intervistë, ajo u shpreh se jeta e saj sentimentale është aktualisht e qetë dhe se asnjëherë nuk i ka thënë “jo” punës. Ky angazhim i ri tregon pikërisht këtë anë të saj. Xheneta duket e fokusuar te zhvillimi profesional dhe pavarësia e saj financiare. /Prive By Liberta Spahiu
