Aktori Chris Rock ka bërë një rrëfim të papritur që po rindez diskutimet mbi sherrin e famshëm me Will Smith, duke hedhur dritë mbi një rivalitet të vjetër që lidhet me legjendën e rap-it, Tupac Shakur.
Gjatë një bisede në podcast-in “Fly On the Wall”, Rock u pyet për 5 reperët e tij të preferuar dhe, për habinë e të gjithëve, la jashtë listës emrin e Tupac, pavarësisht se ai konsiderohet botërisht si një nga ikonat e këtij zhanri.
I vendosur përballë pyetjes se pse e mori këtë vendim, Chris Rock pranoi hapur se kishte një konflikt të pashpallur me ‘Pac.
Sipas aktorit, ata të dy shpesh kishin pëlqime për të njëjtat gra dhe, në shumicën e rasteve, Tupac ishte ai që arrinte t’i bënte për vete.
Ky detaj ka ngritur dyshime të forta, pasi dihet botërisht se lidhja më e ngushtë e Tupac ka qenë pikërisht me Jada Pinkett Smith, bashkëshorten e Will Smith.
Kjo ka bërë që mediat dhe fansat të ngrenë pyetjen: A ka pasur edhe Chris Rock një histori të shkuar me Jadën që nuk është bërë kurrë publike?
Nëse po, ky tension i mbartur prej dekadash mund të jetë arsyeja e vërtetë e shpërthimit të Will Smith në skenën e “Oscars 2022”, duke e bërë shakanë e Rock thjesht pikën që mbushi gotën.
Edhe pse Jada ka deklaruar gjithmonë se me Tupac ishin vetëm “shpirtra binjakë” në mënyrë platonike, rrëfimi i fundit i Chris Rock shton një kapitull të ri e mjaft intrigues në këtë dramë të gjatë të Hollywood-it. /Prive By Liberta Spahiu
