Pas një periudhe të gjatë pauze dhe dedikimi të plotë në industrinë e modës, Besa Tafari, motra e këngëtares Dafina Zeqiri, ka vendosur të ndezë sërish mikrofonat dhe t’i rikthehet pasionit të saj të madh.
Ajo sapo ka prezantuar për publikun projektin e saj më të ri muzikor të titulluar “If I Knew”, duke shënuar një rikthim të fuqishëm që vjen me një identitet krejtësisht të pavarur, të rafinuar dhe të mirëmenduar në çdo detaj, larg klisheve të zakonshme të tregut tonë. E rritur mes kulturave të ndryshme në Suedi, Gjermani dhe Kosovë, Besa ka pasur fatin dhe mundësinë të zhvillojë një këndvështrim jashtëzakonisht të gjerë mbi artin dhe jetën, gjë që sot reflektohet dukshëm në stilin e saj muzikor.
Kënga “If I Knew” vjen e shoqëruar edhe me një videoklip mjaft estetik dhe të kuruar deri në detajin më të vogël, ku zëri i saj i ngrohtë dhe plot ndjenjë gjen hapësirën perfekte për të shkëlqyer dhe për të përcjellë emocion të pastër.
Nga ana muzikore, ky projekt është një gërshetim shumë i këndshëm i energjisë pozitive të rrymave house dhe pop, të cilat ndërthuren mrekullueshëm me melodi më melankolike dhe sensitive të rrymës R&B, duke krijuar një atmosferë unike sonore. Përpara se të vendoste t’i dedikohej sërish studios muzikore, Besa ka pasur një rrugëtim jashtëzakonisht të suksesshëm dhe mjaft intensiv në botën e modës ndërkombëtare, duke punuar si modele me kohë të plotë në kryeqendrat më të mëdha të botës si Nju Jork, Paris, Milano dhe Londër.
Ky rrugëtim i gjatë në industrinë e modës së lartë i ka dhënë asaj një tjetër dimension të perceptimit të estetikës, gjë që vërehet qartë në klipin e saj të ri dhe në mënyrën se si ajo prezantohet sot para publikut. “If I Knew” është një ftesë e hapur për të gjithë adhuruesit e muzikës së mirë, duke konfirmuar se Besa Tafari është rikthyer me plot meritë për të qëndruar gjatë në skenë. /Prive By Liberta Spahiu
