Arjan Konomi, një nga figurat më të njohura të opinionit publik në Shqipëri, është rikthyer në vëmendje me një rrëfim të sinqertë dhe të drejtpërdrejtë.
I ftuar në emisionin e Arbana Osmanit, “Mirëmbrëma Yje”, Konomi ka folur pa dorashka për arsyen e vërtetë të largimit të tij nga Top Channel, duke konfirmuar zërat që qarkullonin prej kohësh.
Në intervistë, ai zbuloi se gjithçka nisi nga një koment kritik që ai kishte bërë publikisht ndaj opinionistëve të atëhershëm të “Big Brother VIP”, Zhaklin Lekatari dhe Arbër Hajdari.
Çfarë ndodhi në prapaskenë?
Konomi tregoi se pas postimit të tij, kishte marrë një telefonatë nga drejtuesit e televizionit.
“Unë u largova nga Top Channel për një koment që bëra në lidhje me opinionistët e Big Brother. Më morën drejtuesit e televizionit dhe më thanë ‘Hiqe’. Unë i thashë: ‘E kam postuar dhe nuk e heq’. Më bënë pezullim dhe më thanë që nëse nuk e heq, do largohesh. Okej i thashë, largohem unë. Unë u largova nga Top Channel për një postim që nuk e hoqa,” – u shpreh Arjan Konomi përballë Arbana Osmanit.
Çfarë shkruante Konomi në postimin që i kushtoi vendin e punës?
Kujtojmë se bëhet fjalë për një reagim të ashpër të Konomit rreth dy vite më parë, kur ai shprehu zhgënjimin e tij për nivelin e debateve në studio. Në atë kohë, Arjani shkruante se ndjente një “shije të hidhur” nga mënyra se si opinionistët po e trajtonin formatin.
Në postimin viral që refuzoi ta fshinte, ai shprehej:
“Teksa i dëgjoja, më dukus sikur po shikoja njerëz të rëndomtë, mediokër, që diskutojnë në një lokal periferie dhe japin e marrin, thonë e stërthonë, e kthejnë e debatojnë në mënyrën më vulgare në një spektakël. Mediokriteti vret më shumë se injoranca.”
Ky qëndrim parimor mesa duket i ka kushtuar Konomit karrigen e tij në “Për’puthen”, por siç thotë dhe vetë ai, nuk u pendua që mbrojti mendimin e tij të lirë. /Prive By Liberta Spahiu
