Bebe Rexha, ka qenë së fundmi e ftuar në emisionin e njohur “Overheard Happy Hour”, ku ka folur hapur për jetën e saj profesionale dhe atë private.
Gjatë një bisede plot humor dhe spontanitet, këngëtarja nuk ka ngurruar të ndajë një histori sa habitëse, aq edhe ironike nga e kaluara e saj dashurore.
Gjatë intervistës, Bebe zbuloi se një nga ish-partnerët e saj, me të cilin kishte qenë në lidhje për tetë muaj, rezultoi të ishte gay.
“Urime ish-të dashurin tim që doli ‘gay’. Gëzuar!”, u shpreh ajo me tone ironike ndërsa ngrinte gotën për një dolli.
Kur u pyet nga gazetari nëse nuk kishte vënë re asgjë më herët, Rexha u tregua mjaft e sinqertë. Ajo pranoi se ishte e vetmja që nuk e kishte kuptuar të vërtetën, ndryshe nga rrethi i saj i ngushtë.
“Të gjithë miqtë e mi e kishin kuptuar, përveç meje. Edhe mamaja ime e kishte kuptuar,” rrëfeu këngëtarja.
Ajo shtoi se e vërteta doli në dritë gjatë periudhës së Krishtlindjeve, kur partneri i saj ishte larg, ndonëse në fillim ai ishte shfaqur shumë i dashuruar pas saj.
Artistja foli edhe për anën e saj emocionale dhe se si ndikohet nga vëmendja e të tjerëve. Ajo shpjegoi se shpesh kushtëzohemi nga përrallat për dashurinë ideale.
“Edhe sot kur dikush më kushton vëmendje, unë jam tipi që thotë ‘të dua’. Jemi pak të kushtëzuar nga ajo narrativa e përrallave ku bie në dashuri me flutura në stomak, por nuk mund të biesh në dashuri me fluturat, sepse një ditë ato zhduken,” tha ajo duke shkaktuar të qeshura në studio.
Intervista u mbyll në një atmosferë festive, ku Bebe Rexha ngriti një tjetër dolli, këtë herë për suksesin dhe vetëbesimin e saj. Ajo theksoi se ndihet më mirë se kurrë si një grua e pavarur.
“Unë jam e pavarur. Kjo është diçka shumë e madhe për mua. Tani më në fund ndihem e lirë,” përfundoi artistja shqiptare. /Prive By Liberta Spahiu
