Reperi amerikan Sean “Diddy” Combs është transferuar nga një institucion korrektues në New Jersey në një burg federal në Pensilvani, ka konfirmuar Byroja Federale e Burgjeve në SHBA.
Sipas BBC-së, 56-vjeçari u transferua të premten në FCI Allenwood Low, një institucion me siguri të ulët, rreth 250 kilometra në perëndim të New York-ut.
Përfaqësuesi i reperit, Juda S. Engelmayer, deklaroi se transferimi nga një burg me siguri të ulët në një tjetër të së njëjtës kategori është në përputhje me një vendim të marrë duke pasur parasysh sigurinë.
Autoritetet nuk kanë dhënë hollësi mbi arsyet konkrete të transferimit, duke iu referuar privatësisë dhe sigurisë.
Lëvizja vjen pas raportimeve të mediave amerikane se Combs kishte pasur trajtim të privilegjuar gjatë qëndrimit në burgun Fort Dix, në New Jersey. Sipas NBC News, reperi dyshohet se kishte pasur qasje në telefona celularë, alkool dhe sende të tjera të ndaluara, si dhe se kishte paguar të burgosur të tjerë për shërbime personale.
Po sipas këtij raportimi, sjellja e tij në burg ishte një prej faktorëve të përmendur në lidhje me transferimin. Megjithatë, autoritetet federale nuk kanë konfirmuar publikisht këto pretendime.
Ndërkohë, data e parashikuar e lirimit të reperit është zhvendosur në 2 mars 2028, pasi atij i janë hequr 41 ditë nga përfitimi i mundshëm për sjellje të mirë, sipas raportimeve të NBC News dhe të dhënave të burgut të cituara nga BBC.
Diddy, i cili u dënua me 50 muaj burg për dy vepra penale të lidhura me prostitucionin, ka kërkuar nga gjykata e apelit që të lirohet dhe të rrëzohet dënimi i tij.
Përfaqësuesi i tij ka shprehur mirënjohje që autoritetet po e trajtojnë me seriozitet sigurinë dhe mirëqenien e reperit, duke shpresuar që ai të vazhdojë vuajtjen e dënimit pa ndërprerje të panevojshme.
/Prive By LS
