Ka qenë një nga lëvizjet më të diskutuara të televizionit shqiptar, por tani çdo gjë është e zezë mbi të bardhë. Arbana Osmani ka konfirmuar përmes një promoje në llogarinë e saj në Instagram se do të jetë prezantuesja e re e “Ferma VIP”.
Me një video të shkurtër ku shfaqet në ambientet e kuruara rustike të fermës, moderatorja shkroi “Le të fillojnë lojërat”, duke etiketuar Vizion Plus dhe platformën Tring, për të zyrtarizuar kalimin e saj.
Për vite me radhë, emri i Arbanës ka qenë pazgjidhshmërisht i lidhur me Top Channel, ku u kthye në ikonën absolute të “Big Brother” dhe mbajti mbërthyer shqiptarët pas ekranit. Kjo është hera e parë në historinë e karrierës së saj të gjatë që ajo lë atë shtëpi televizive për t’u shfaqur zyrtarisht në logon e një televizioni tjetër, një lëvizje kjo që i jep një tjetër dinamikë tregut mediatik. Ndërkohë, megjithëse për një periudhë qëndroi larg ekranit tradicional, ajo nuk e humbi kurrë kontaktin me publikun, pasi zhvilloi me sukses programin e saj të intervistave “Mirëmbrëma yje” në kanalin personal në YouTube.
Pyetja që të gjithë kanë tani është se kur do të nisë reality show i ri. Sipas burimeve të sigurta të Prive By Liberta Spahiu, “Ferma VIP” pritet të ndezë motorët e transmetimit në fund të muajit mars, duke sjellë një sfidë të vërtetë për audiencën e prime-time. Ky rikthim i Arbanës në një format të madh vjen pas atij largimi shumë të përfolur nga “Big Brother VIP Albania”, për të cilin ajo theu heshtjen kohë më parë.
Prezantuesja rrëfeu hapur se dy vite më parë, pavarësisht se ishte në pozicionin më të lakmuar me rroga me shumë zero, kontrata të majmë dhe audiencë maksimale, e vetmja gjë që donte asokohe ishte që ai format të mbaronte një orë e më parë. Tani, me energji të reja dhe në një format krejt tjetër, pritet që Arbana të rikthejë edhe njëherë shkëlqimin e saj të padiskutueshëm. /Prive By Liberta Spahiu
View this post on Instagram
