Spektakli përfundoi, dritat e shtëpisë më të famshme u fikën, por duket se dramat e vërteta sapo kanë filluar. Big Brother VIP Kosova 4 uli siparin këtë të premte, dhe ndërsa e gjithë vëmendja ishte te shpallja e fituesit, detektivët e showbiz-it po ndiqnin një tjetër telenovelë që po luhej larg syrit të kamerave.
Dy zonjat e panelit, Olta Gixhari dhe Leonora Jakupi, të cilat gjatë gjithë edicionit ndanë karriget e opinionisteve dhe dhanë mendimet e tyre për banorët, duket se në prapaskenë nuk kanë pasur aspak të njëjtën harmoni.
Kujtojmë se në fillim të sezonit, dyshja reflektonte një raport krejtësisht tjetër.
Ato u panë të pandara, madje duke u rregulluar dhe bërë gati bashkë në të njëjtin hotel për netët e para të spektaklit, duke i dhënë publikut idenë e një miqësie të re plot shkëlqim. Por, me kalimin e javëve dhe shtimin e dinamikave, një lloj tensioni i heshtur mes tyre u vu re herë pas here nga shikuesit më të mprehtë gjatë netëve “Prime”. Dhe ja ku jemi sot, ku lëvizjet në rrjetet sociale flasin më shumë se çdo deklaratë e kuruar televizive.
Ditën e finales së madhe të premten, ra në sy një detaj tepër interesant: Leonora Jakupi e kishte fshirë nga lista e saj e personave që ndjek në Instagram aktoren Olta Gixhari. Në atë moment, Olta ende figuronte si ndjekëse e këngëtares. Megjithatë, sapo eksperienca televizive u vulos zyrtarisht si e mbyllur dhe konfetit e finales ranë, Olta nuk humbi kohë. Ajo reagoi duke ia kthyer me të njëjtën monedhë dhe e fshiu Leonorën nga miqtë e saj virtualë.
Ky “unfollow” i dyanshëm flet hapur për mospajtime dhe një “luftë të ftohtë” që dyshja ka arritur ta menaxhojë në heshtje, duke mos e lënë të shpërthejë plotësisht para publikut për hir të profesionalizmit.
Për Oltën, kjo situatë në fakt i ngjan një skenari të njohur, pasi rikujtojmë se edhe vitin e kaluar gjatë edicionit të tretë, marrëdhënia e saj me kolegun e panelit, Milaim Zekën, ishte gjithçka tjetër përveçse paqësore. Mbetet për t’u parë nëse ndonjëra nga vajzat do të vendosë të thyejë heshtjen dhe të na tregojë se çfarë e krisi fiks atë raport që nisi me kaq shumë stil e buzëqeshje në dhomat e grimit. /Prive By Liberta Spahiu
