Një grua nga Virginia e SHBA-së ka treguar historinë e saj të jashtëzakonshme, pasi pësoi arrest kardiak të papritur dhe u shpall klinikisht e vdekur për plot 24 minuta.
Lauren Canaday, në vitin 2023, përjetoi një krizë të rëndë epileptike (e njohur si kriza grand mal), gjatë së cilës muskujt iu kontraktuan me forcë dhe frymëmarrja iu ndal.
“Burri im ishte në dhomën përballë dhe më dëgjoi të thoja ‘Oh s***’. Ai u fut menjëherë brenda dhe më gjeti pa ndjenja në dysheme. Kisha ndalur së marrë frymë dhe isha bërë blu,” tregoi Lauren për Newsweek.
Falë reagimit të shpejtë të bashkëshortit të saj – me masazh kardiak dhe thirrje urgjence – Lauren arriti të mbijetonte deri në mbërritjen e mjekëve katër minuta më vonë. Në spital, ajo rezultoi pozitive me Covid-19 dhe iu diagnostikua me miokardit, një inflamacion i muskulit të zemrës që dobëson funksionin e saj. Mjekët dyshojnë se pikërisht Covid-19 mund të ketë shkaktuar arrestin kardiak.
Ajo zbuloi se i duheshin 24 minuta dhe katër goditje me defibrilator që zemra e saj të rifillonte rrahjet. Pas 9 ditësh në kujdesin intensiv, Lauren u shpall “kognitivisht e paprekur”, pa dëmtime të dukshme në tru. Megjithatë, sfidat e saj nuk përfunduan me kaq.
Në një diskutim online, ajo tregoi se si, pasi u lirua nga spitali, mbeti e vetme përballë dhimbjeve të forta nga ndërhyrja kirurgjikale dhe një liste të gjatë ilaçesh.
“Njerëzit mendojnë se kur të ndodh diçka kaq ekstreme, ekziston një rrjet mbështetjeje. GABIM. Thjesht më dërguan në shtëpi… Unë dhe burri im mbetëm të përballemi vetëm. Nuk erdhi asnjë punëtor social të më tregonte si të aplikoja për ndihmë, dhe mjekët kanë vetëm 10 minuta kohë për ty,” tha ajo.
Lauren foli hapur edhe për barrën emocionale:
“E ndiej sikur jeta ime e parë përfundoi në shkurt dhe u zgjova në jetën e dytë. Njerëzit mendojnë se jam më mirë sepse ec dhe ngjitem përsëri në male (ngadalë), por brenda nuk ndihem e njëjta. Kur më thonë se dukem mirë, për mua është e frikshme sepse unë gjithmonë jam e vetëdijshme për atë që ndodhi.”
Ajo shtoi: “Ndonjëherë më duket sikur bota do të kishte preferuar të mos kisha ardhur sërish, sepse nuk ishte e përgatitur të kujdesej për mua. Do të bëj çfarë të mundem që të tjerët të mos ndihen kështu.”
Megjithëse mbijetoi, Lauren pranoi se vazhdon të përballet me insuficiencë kardiake dhe probleme të tjera emocionale e mendore. “Jam përgjithësisht më keq se para se të shpallesha e vdekur klinikisht,” tha ajo me dhimbje.
Raste të tilla janë jashtëzakonisht të rralla. Sipas Fondacionit Britanik të Zemrës, vetëm 8% e pacientëve që pësuan arrest kardiak jashtë spitalit në vitin 2022 arritën të mbijetonin 30 ditë pas ngjarjes.
