Ndërsa efektet anësore të barnave GLP-1 si Ozempic po dalin në pah, përdoruesit kanë filluar të flasin hapur për ndikimin që kanë ndjerë – nga ndryshimet në lëkurë deri te dëshira seksuale. Kur vjen puna te kjo e fundit, reagimet janë të ndryshme.
Në forumin r/Ozempic në Reddit, disa përdorues kanë pohuar se libidoja e tyre ka ndryshuar ndjeshëm që prej fillimit të përdorimit të Ozempic – një ilaç i krijuar për diabetin e tipit 2, por që përdoret gjerësisht edhe për rënie në peshë.
Disa thonë se e kanë humbur krejt dëshirën për seks:
“Është si të jetë zhdukur fare,” shkroi një përdorues, ndërsa një tjetër shtoi: “Ka ikur. Më mungon!”
Ndërkohë, të tjerë kanë përjetuar rritje të libidos – madje disa thonë se kanë kaluar vite pa ndjerë fare dëshirë para se të përdornin Ozempic.
Megjithëse mungojnë studime të thelluara mbi efektin e GLP-1 në dëshirën seksuale, përvojat e përdoruesve sugjerojnë ndikim të mundshëm.
Një faktor është humbja e shpejtë në peshë, e cila mund të shkaktojë çekuilibër hormonal. Po ashtu, ulja e oreksit dhe marrja më e ulët e kalorive mund të ndikojë në nivelin e energjisë dhe dëshirën seksuale.
Efekte të tjera anësore si fryrja apo të përzierat mund të ndikojnë negativisht në ndjesinë e të qenit “seksual”.
Sipas Stephanie Faubion nga Mayo Clinic, Ozempic mund të ulë dëshirën në përgjithësi – për ushqim, alkool apo seks – por ende nuk ka përfundime të qarta: “Juria ende nuk ka vendosur.”
Nga ana tjetër, disa e përjetojnë rritjen e libidos. David B. Sarwer nga Universiteti Temple thekson se njerëzit me obezitet kanë më shumë probleme seksuale për shkak të sëmundjeve si diabeti dhe sëmundjet kardiovaskulare, të cilat ndikojnë në qarkullimin e gjakut dhe prodhimin e testosteronit.
Humbja në peshë ndihmon në përmirësimin e këtyre faktorëve dhe, rrjedhimisht, të dëshirës seksuale.
Rritja e vetëbesimit dhe lehtësia në lëvizje gjatë aktit seksual janë gjithashtu arsye që disa përdorues përjetojnë më shumë kënaqësi pas humbjes në peshë:
“Tani, kur jam në pozicione të caktuara, nuk ndjej dhimbje më – gjithçka është më mirë,” tha një përdorues për Wired.
Reagimi ndaj Ozempic varet nga individi – biologjia, hormonet dhe niveli i mëparshëm i libidos janë faktorë kyç. Dr. James Simon nga Universiteti George Washington thotë:
“Barnat ndikojnë në të njëjtat pjesë të trurit ku ndodhen ndjesitë e kënaqësisë – tek të dy gjinitë.”
Prodhuesi Novo Nordisk deklaroi për UNILAD se siguria e pacientëve është prioritet, dhe inkurajon përdoruesit që të marrin ilaçet vetëm për përdorim të miratuar dhe të raportojnë çdo efekt anësor te mjeku apo përmes sistemit “MHRA Yellow Card”.
/Prive By Liberta Spahiu
