Ermiona Lekbello, ish-banorja ikonike e edicionit të dytë të “Big Brother VIP Albania”, është kthyer sërish në qendër të vëmendjes mediatike. Ditët e fundit, rrjeti ka gëluar nga lajmet dhe artikujt e portaleve se ajo do të jetë një nga pjesëmarrëset e formatit më të ri televiziv, “Ferma VIP”, i cili pritet të nisë transmetimin për pak javë.
Pas qarkullimit të këtyre zërave të shumtë, këngëtarja ka vendosur të reagojë publikisht përmes një postimi sqarues në llogarinë e saj në Instagram. Ajo ka shpërndarë një prej artikujve që e bën atë pjesë të kastit, duke iu drejtuar fansave me fjalët: “Dua të sqaroj ndjekësit e mi të dashur se nuk ka asgjë të vërtetë në këto lajme për praninë time në Ferma VIP.”
Megjithatë, fraza e saj e radhës e bëri situatën akoma më interesante dhe zbuloi më shumë nga ç’duket në pamje të parë.
Duke theksuar se “nuk është finalizuar asnjë bisedë, ndaj këto lajme janë thjesht thashetheme”, Ermiona në fakt la të kuptohet indirekt se ftesa dhe negociatat mes saj dhe produksionit kanë ekzistuar realisht. Edhe pse për momentin nuk ka një marrëveshje përfundimtare, fakti që ka pasur bisedime tregon se dyert nuk janë plotësisht të mbyllura.
Mbetet për t’u parë nëse palët do të gjejnë gjuhën e përbashkët në ditët e fundit para nisjes së spektaklit. /Prive By Liberta Spahiu
