Meta po sjell mjetet e saj të inteligjencës artificiale (AI) direkt në Instagram Stories, duke ofruar një mënyrë të re për redaktim përmes komandave me tekst.
Tani përdoruesit mund të kërkojnë ndryshime në foto duke shtuar, hequr ose transformuar plotësisht elemente të përmbajtjes.
Deri më tani, Meta kishte ofruar mundësi të kufizuara për redaktim fotosh përmes chatbot-it Meta AI, por me këtë përditësim, funksionet e reja bëhen shumë më të thjeshta dhe më të aksesueshme për të gjithë.
Opsionet e reja shfaqen në menunë “Restyle”, e cila ndodhet në krye të ekranit të Stories, pasi të klikoni ikonën e furçës.
Për të bërë ndryshime, mjafton të zgjidhni një nga opsionet “add”, “remove” ose “change” dhe të shkruani përshkrimin e dëshiruar.
Meta jep disa shembuj: mund të ndryshoni ngjyrën e flokëve, të shtoni një kurorë në kokë ose një perëndim dielli në sfond.
Po ashtu, ekzistojnë efekte të gatshme që mund të transformojnë veshjen apo stilin e fotos — si shtimi i syzeve të diellit, një xhakete lëkure ose efekti i akuarelit.
Në video, mund të krijoni pamje me borë apo flakë që lëvizin.
Megjithatë, Meta thekson se përdorimi i këtyre funksioneve përfshin pranimin e kushteve të reja të shërbimit, të cilat lejojnë analizimin e mediave dhe tipareve të fytyrës përmes inteligjencës artificiale.
Sipas këtyre kushteve, kur ngarkoni imazhe, Meta mund të “analizojë, përmbledhë dhe modifikojë përmbajtjen, si dhe të gjenerojë elemente të reja bazuar në të.” /Prive By Liberta Spahiu
