Një mjek ka paralajmëruar për pesë gabimet më të zakonshme që bëjnë personat që kanë përdorur injeksione për humbje peshe kur vendosin t’i ndalojnë ato.
Edhe pse Ozempic është i licencuar vetëm për trajtimin e diabetit të tipit 2, medikamente të ngjashme GLP-1 janë përdorur gjerësisht për qëllime të rënies në peshë. Këto përfshijnë Mounjaro, Wegovy dhe Saxenda, të cilat injektohen një herë në javë dhe ndihmojnë në kontrollin e oreksit. Shumë kanë pasur sukses me to, por si çdo ilaç tjetër, kanë edhe rreziqe të efekteve anësore.
Sipas Mayo Clinic, mjekët rekomandojnë përdorimin e këtyre injeksioneve për të paktën 12 deri në 24 muaj. Pra, ato nuk janë të destinuara të merren për gjithë jetën dhe shumë njerëz vendosin t’i ndërpresin sapo të arrijnë një peshë më të shëndetshme.
Megjithatë, një mjek familjar, Dr Donald Grant, ka treguar pesë gabimet më të zakonshme që bëhen kur ndalon trajtimi:
1. Ndërprerja “cold turkey” (papritur)
Ndërprerja e menjëhershme mund të sjellë rikthimin e oreksit dhe zakone të këqija ushqimore, duke shkaktuar shtim në peshë.
Zgjidhja: gjithmonë konsultohuni me mjekun për një plan të mundshëm reduktimi gradual, si edhe për këshilla ushqimore dhe të stilit të jetesës.
2. Nevoja për aktivitet fizik
Shumë persona harrojnë të fusin aktivitetin fizik gjatë trajtimit, gjë që më vonë sjell shtim në peshë.
Dr Grant rekomandon të paktën 30 minuta aktivitet në ditë – qoftë shëtitje, vrap, biçikletë apo palestër.
3. Nevoja për ndryshime në dietë
Mosndryshimi i dietës është një tjetër gabim i madh.
Pas ndërprerjes së injeksioneve, është e rëndësishme një plan ushqimor me vakte të strukturuara, proteina, fibra dhe yndyra të shëndetshme. Nuk rekomandohen dietat drastike, por një regjim i balancuar për mirëqenie afatgjatë.
4. Ndalimi shumë i hershëm i trajtimit
Këto medikamente janë të dizajnuara për përdorim afatgjatë. Ndalimi i parakohshëm nuk i jep trupit kohë të mjaftueshme për t’u përshtatur, duke rritur rrezikun e rikthimit të kilogramëve.
Nëse shfaqen efekte anësore të pakëndshme, duhet patjetër konsultim me mjekun.
5. Injorimi i peshoreve
Edhe pse pesha nuk duhet të kthehet në fiksim, monitorimi pas ndërprerjes së trajtimit është i rëndësishëm.
Mbajtja nën kontroll e peshës ndihmon që të mos humbet progresi dhe investimi i bërë në trajtim.
Dr Grant përfundon:
“Ndërprerja e injeksioneve pa ndryshuar stilin e jetesës ose dietën mund të ketë pasoja serioze. Shumë shpesh, kjo sjell rikthimin e kilogramëve të humbur. Ndaj, kujdesi dhe planifikimi janë thelbësorë.”
