Pas lajmeve që qarkulluan ditën e djeshme, ku u raportua se këngëtarja me famë botërore Dua Lipa kishte larguar nga puna agjentin e saj pas një letre të nënshkruar prej tij kundër Palestinës, artistja ka reaguar publikisht në rrjetet sociale.
Në një postim të shpërndarë në Instagram, Dua e quajti historinë e publikuar nga Daily Mail “plotësisht të rreme” dhe kritikoi ashpër gjuhën e përdorur nga tabloidi britanik.
“Unë nuk e miratoj veprimet e David Levy apo të ndonjë drejtuesi tjetër muzikor ndaj një artisti që flet të vërtetën e tij. Nuk mund ta injoroj as mënyrën se si kjo çështje u trajtua në media. Jo vetëm që historia ishte krejtësisht e rreme, por gjuha e përdorur nga Daily Mail ishte e qëllimshme për të ndezur tensione, e krijuar thjesht për klikime dhe për të nxitur ndarje online,” shkroi këngëtarja.
Ajo shtoi se, pavarësisht se gjithmonë ka mbajtur qëndrimin e saj për “Free Palestine”, është e papranueshme të shfrytëzohet një tragjedi globale për shitje gazetash. “Kjo është diçka që e shoh thellësisht shqetësuese,” – theksoi Dua Lipa.
Ky reagim vjen pas bujës që shkaktoi lajmi i ditës së djeshme, i cili u përhap gjerësisht në media dhe rrjete sociale, duke vendosur sërish Dua Lipën në qendër të debateve ndërkombëtare për qëndrimin e saj pro Palestinës. /Prive By Liberta Spahiu
