Një 21-vjeçar austriak me origjinë austro-maqedonase dhe rrënjë shqiptare është dënuar me 15 vite heqje lirie pasi u shpall fajtor për planifikimin e një sulmi terrorist xhihadist në koncertin e yllit amerikan, Taylor Swift, në Vjenë. Sulmi ishte parashikuar të kryhej gjatë turit të saj të famshëm “Eras Tour” në gusht të vitit 2024. I riu, i identifikuar si Beran Aliji (i referuar në gjykatë si Beran A. për shkak të ligjeve të privatësisë), u gjet fajtor edhe për një sërë veprash të tjera që lidhen me terrorizmin.
Aliji u arrestua falë një informacioni sekret të siguruar nga inteligjenca amerikane (CIA), vetëm pak kohë përpara se të niste i pari nga tre koncertet e shitura plotësisht në stadiumin “Ernst Happel” të Vjenës. Pas zbulimit të komplotit, të treja koncertet u anuluan menjëherë, duke mërzitur rreth 200,000 fansa që prisnin të shihnin këngëtaren, si dhe vetë yllin e popit.
Radikalizimi dhe tentativat për blerje armësh
Sipas prokurorëve të çështjes, Beran Aliji ishte radikalizuar shpejt në internet dhe kishte betuar besnikëri ndaj grupit xhihadist të Shtetit Islamik (IS). Hetimet treguan se ai kishte tentuar, ndonëse pa sukses, të blinte armë në rrugë ilegale, duke përfshirë një mitraloz dhe një granatë dore. Psikiatri i gjykatës, Peter Hoffmann, dëshmoi se 21-vjeçari nuk shfaqte shenja të sëmundjeve mendore, duke shtuar se nuk kishte “asnjë shpjegim psikiatrik” për radikalizimin e tij.
Gjatë seancës gjyqësore të mbajtur në Wiener Neustadt, një qytet në jug të Vjenës, bashkë me të u dënua edhe një tjetër 21-vjeçar i identifikuar si Arda K., me origjinë nga Sllovakia. Ky i fundit u dënua me 12 vite burg nën akuzën e të qenit pjesë e së njëjtës qelizë terroriste të IS-it, ndonëse nuk ishte i përfshirë drejtpërdrejt në planin kundër koncertit. Përpara se juria të tërhiqej për vendimin, Aliji u shpreh para gjykatës se i vinte keq për veprimet e tij.
Reagimi i Taylor Swift: “Po ziteshim për koncertet, jo për jetët”
Vetë Taylor Swift ka përshkruar më parë se si turneu i saj historik i shpëtoi për pak një “situate masakre”. Një dokumentar i fundit mbi turneun e saj zbuloi se këngëtarja e mori vesh lajmin e frikshëm për bombën teksa po udhëtonte drejt Austrisë. Pak kohë pas anulimit, Swift pranoi publikisht se ngjarja e kishte mbushur me “një ndjenjë të re frike” dhe një “faj të madh” ndaj fansave për anulimet.
Megjithatë, mega-ylli amerikan u shpreh tejet falënderuese ndaj forcave të rendit në një postim në Instagram: “Isha gjithashtu shumë mirënjohëse ndaj autoriteteve, sepse falë tyre, ne po mbanim zi për koncertet e humbura dhe jo për jetët e humbura,” deklaroi ajo, duke vlerësuar ndërhyrjen e shpejtë që parandaloi tragjedinë. /Prive By Liberta Spahiu
