Në studimin më të madh të kryer ndonjëherë mbi përdorimin e cigareve elektronike nga të rinjtë, studiues nga Universiteti i York-ut dhe nga Shkolla e Higjienës dhe Mjekësisë Tropikale në Londër analizuan gati 400 studime të veçanta nga e gjithë bota, në atë që quhet një “rishikim ombrellë”.
I publikuar në revistën Tobacco Control, ky studim zbuloi se cigaret elektronike veprojnë si produkte “urë” drejt përdorimit të cigareve tradicionale, pa përmendur dëmet e shumta që shkaktojnë në shëndetin e trupit të njeriut.
Në një thirrje të drejtpërdrejtë ndaj prindërve dhe qeverive, ekspertët thanë se fëmijët që fillojnë të përdorin vape kanë tre herë më shumë gjasa të bëhen duhanpirës në të ardhmen.
Profesorja e asociuar në Shkencat e Shëndetit në Universitetin e York-ut, Dr. Su Golder, deklaroi se fuqia e provave nuk mund të shpërfillet më.
“Konsistenca e provave është tronditëse,” tha ajo. “Në shumë studime, të rinjtë që përdorin cigare elektronike kanë më shumë gjasa të fillojnë duhanin në të ardhmen. Këto gjetje mbështesin masa më të forta të shëndetit publik për të mbrojtur adoleshentët nga rreziqet që lidhen me vaping-un.”
Bashkëautori Dr. Greg Hartwell nga LSHTM shtoi:
“Gjetëm prova të qëndrueshme për kalimin nga përdorimi i vape në duhanpirje, gjë që hap derën për një sërë dëmesh që sjellin cigaret tradicionale.
“Siç thotë edhe kryemjeku i Qeverisë së Mbretërisë së Bashkuar, reklamimi i cigareve elektronike për fëmijët është gjithmonë i papranueshëm, dhe shqyrtimi ynë tregon qartë pse duhen më shumë kufizime për industrinë e duhanit, e cila kontrollon tregun e vape-ve.”
Të dhënat treguan gjithashtu një rritje të rrezikut për zhvillimin e astmës dhe sulmeve astmatike, si dhe shkallë më të lartë të bronkitit dhe pneumonisë.
Adoleshentët u ankuan për marramendje, migrena dhe dhimbje koke, ndërsa studiuesit gjetën prova edhe për ulje të numrit të spermës tek meshkujt, madje edhe lidhje me ankthin dhe mendime vetëvrasëse.
Vape-t, të cilat shiten në një pafundësi shijesh, mund të çojnë edhe në abuzim me alkoolin në të ardhmen, me shumë të rinj që më vonë nisin të përdorin edhe kanabis.
Autorja kryesore e studimit, Dr. Rebecca Glover, kërkoi që politikëbërësit të reflektojnë thellë përballë rezultateve të këtij kërkimi.
“Vaping-u po ndikon negativisht në shëndetin e të rinjve në mbarë botën dhe duket se është një derë hyrëse drejt substancave të tjera,” u shpreh ajo.
“Studimi ynë ofron provat më të forta deri më tani se të rinjtë globalisht përballen me një sërë dëmesh fizike dhe psikologjike nga vaping-u dhe kanë rrezik më të lartë të kalojnë në duhanpirje.”
Shifra shqetësuese të përmbledhura nga NHS konfirmojnë se 10% e fëmijëve të moshës 11 deri në 15 vjeç tani janë përdorues të rregullt të vape-ve.
Për shkak të përmasave epidemike të këtij problemi, NHS ka hapur klinikën e parë të specializuar për ndihmën e të rinjve të varur nga vape-t, në Spitalin për Fëmijë Alder Hey.
Mësuesit britanikë thonë se konfiskimet e vape-ve janë në rritje të pandalshme, ndërsa një organizatë spitalore pretendon se gati 17% e pajisjeve të konfiskuara përmbanin Spice, një substancë sintetike tepër e rrezikshme.
